Францын хөл бөмбөгийн шигшээ баг Парагвайн багийг 1:0 харьцаагаар хожсоноор ДАШТ-ий шөвгийн 8-д шалгарлаа. Ням гарагт шилжих шөнө болсон хоёр багийн тоглолтын үеэр хэт халж байснаас гадна Латин Америкийн баг тун бүдүүлэг бохир байдлаар тогложээ.

АНУ-ын Филафельфи хотод болсон тоглолт эхлэх үед +38 хэм хүртэл халж байсан боловч тоглолтыг хойшлуулсангүй, учир нь, ийм нөхцөлд тоглохыг хоёр баг зөвшөөрсөн бололтой. Харьцуулваас, Оросын Премьер-лигийн дүрмээр бол, агаарын хэм +35-аас давсан үед аль нэг баг талбайд гарахаас татгалзваас тоглолтыг хойшлуулдаг.

Хэт халалт хөлбөмбөгчдөд нөлөөлж байгааг тоглолтын эхний үе харууллаа. Фаворитууд буюу ДАШТ-д түрүүлэх магадлалтай баг болох Францын шигшээ бүх хүчээрээ хаалгаа хамгаалж буй парагвайчуудын хамгаалалтыг сэтлэх аргыг олох гэж хичээж байв. Үүний эсрэг латин америкчууд маш бүдүүлэг бохир тоглож байлаа.

Хоёрдугаар үед тэд бүр ч илүү бохир тоглолт үзүүлэх болов. Ялангуяа хагас хамгаалагч Матиас Галарса эхлээд Мбаппег, дараа нь хамгаалагч Жюль Кундег цохижээ. Гэвч Узбекстаны шүүгч Ильгиз Танташев түүнд шар хуудас өгсөнгүй. Тоглолтын төгсгөлд Галарса Францын багийн Майкл Олисег өдөж байгаад өөрөө цохиулж, өрсөлдөгчөө шар хуудсаар торгуулсан байна.  

Хоёрдугаар үед талбайн ихэнх хэсгийг цэнгэлдэхийн дээврийн сүүдэр халхлах үед францчуудын тоглолт идэвхжлээ. Гэвч халуун агаар тоглогчдод нөлөөлсөөр байв. К.Мбаппе хаалгач Майк Меньяны дамжуулсан бөмбөгийг авч, “чулуу болгох” гэж оролдсоор байтал Парагвайн хамгаалагч Хуан Касерес түүнийг гүйцэж ирлээ.

Харин 61 дэх минутанд Францын багт сэлгээгээр Дезире Дуэ орж ирээд, дриблинг буюу хамгаалагчдыг хууран урагшлах оролдлогыг хоёр удаа хийсний дүнд багтаа пенальти цохих боломжийг авчирч, Мбаппе торгуулийн цохилтыг итгэлтэйгээр гүйцэтгэв. Ингэснээр тэрбээр энэ удаагийн ДАШТ-д оруулсан гоолын тоогоор Л.Месситэй эн зэрэгцсэн бол /7 гоол/ ДАШТ-үүдэд оруулсан нийт гоолын тоогоор /19 гоол/ Аргентины довтлогчид /20/ тун ойртжээ.

"Бохир тоглолтынх нь хариуг бид өгсөн"

Тоглолтын дараа Мбаппе парагвайчуудын бүдүүлэг тоглолтыг шүүмжлэн ярихдаа “Францын шигшээ бол зөвхөн довтолж чаддаг баг биш ээ, бид ямар ч төрлийн, тэр дундаа бохир тоглолт ч хийж чадна. Биднийг гоёлын костюмтай гарч ирээд соёлтой тоглоно гэж өрсөлдөгчид маань бодсон байх, харин бид бохир тоглолт ч хийж чадна. Парагвайчууд хөл бөмбөг тоглох гэж ирээгүй юм байна, хөл бөмбөгийг хэрхэн тоглодог вэ гэдгийг бид тэдэнд үзүүллээ” гэв.   

Мөн Францын шигшээгийн дасгалжуулагч Дидье Дешам парагвайчуудын тоглолтын хэв маягийг рестлинг буюу мэргэжлийн бөхийн барилдааны шоу үзүүлбэртэй харьцуулжээ. “Өнөөдрийн тоглолт нь бидний мэддэг хөл бөмбөг биш, харин рестлингтэй илүү төстэй байлаа. Ийм нөхцөлд тоглолтын хэмнэлийг олж, чанартай тоглолт үзүүлэхэд тун хэцүү” хэмээн тэрбээр ярилаа.

Ташрамд дурдахад, Францын шигшээг 2012 оноос хойш дасгалжуулж буй Д.Дешам ДАШТ-ий түүхэнд хамгийн олон удаа багаа ялалтанд хүргэсэн /18 удаа/ дасгалжуулагч болжээ. Түүний удирдлага дор францчууд 2018 оны дэлхийн аварга болж, 2022 онд ДАШТ-ий мөнгө медаль хүртэж, 2016 оны Европын аваргаар шалгарсан юм. Тэрбээр энэ удаагийн ДАШТ-ийг дуусгаад дасгалжуулагчийн албанаас чөлөөлөгдөх ажээ.

Ийнхүү Парагвайг хожсон Францын шигшээ баг ДАШТ-үүдэд нийт 150 гоол оруулснаар Бразил /246/, Герман /243/, Аргентины /163/ дараа бичигдэж байна. 

Одоо шөвгийн 8-д тус баг канадчуудыг 3:0-ээр хожсон Мароккогийн шигшээ багтай 10-нд шилжих шөнийн 04:00 цагаас тоглоно. 

ТАСС