Дэлхийн эрүүл мэндийн байгууллагын Номхон далайн баруун бүсийн захирал Др. Саиа Ма’У Пиукала Монгол Улсад ажлын айлчлал хийж энэ сарын 14-20-нд ажиллаж байна.

ЭМЯ-ны Төрийн нарийн бичгийн дарга Н.Эрдэнэбаяр, ДЭМБ-ын Номхон далайн бүсийн захирал Др.Саиа Ма’У Пиукала нар Эх, хүүхдийн эрүүл мэндийн үндэсний төвд зочилж ДЭМБ, АНУ-ын Сэйнт жүүд эмнэлэг хамтран хэрэгжүүлж буй Хүүхдийн хорт хавдрын эмийн хангамжийг сайжруулах глобал платформын хэрэгжилттэй танилцав.

Хүүхдийн хорт хавдрын эмийн хангамжийг сайжруулах глобал платформд ДЭМБ-ын Номхон далайн баруун бүсээс Монгол Улс нэгдэн орсон анхны улсын юм. Глобал платформын хүрээнд 2025 оны 2 дугаар сараас эхлэн 35 нэрийн 2.1 тэрбум төгрөгийн эмийг хүлээн авч эмнэлгийн тусламжид хэрэглэж байна. Дэлхийн платформ нь зөвхөн эмийн нийлүүлэлтээр хязгаарлагдахгүй хүний нөөцийг чадавхжуулах, тусламж үйлчилгээний хүртээмжийг нэмэгдүүлэх, эмийн тооцооллын системийг сайжруулах, шаардлагатай тоног төхөөрөмжийг нийлүүлэх зэрэг олон талын дэмжлэг үзүүлж байна.

Мөн төлөөлөгчид Зоонозын өвчин судлалын үндэсний төвд ажиллаж, үйл ажиллагаатай танилцав. Энэ үеэр “Монгол Улсын цар тахлаас урьдчилан сэргийлэх, бэлэн байдал, хариу арга хэмжээ авах чадавхыг Нэг эрүүл мэндийн зарчимд тулгуурлан бэхжүүлэх” төслийн хүрээнд Зоонозын өвчин судлалын үндэсний төв болон орон нутгийн сүлжээ лабораториудын чадавхыг бэхжүүлэх 8 нэр төрлийн 64 ширхэг орчин үеийн дэвшилтэт лабораторийн тоног төхөөрөмжийг гардуулан өгсөн байна.

Эдгээр тоног төхөөрөмж нь үндэсний болон орон нутгийн түвшинд зоонозын халдварыг молекул биологийн болон дэвшилтэт технологит суурилан нарийвчлалтай, шуурхай оношлох боломжийг бүрдүүлж, нийгмийн эрүүл мэндийн ноцтой байдлын үед хэрэгжүүлэх хариу арга хэмжээний бэлэн байдал, чадавхыг сайжруулсан чухал арга хэмжээ болсон талаар ЭМЯ-наас мэдээлэв.