Монголын Шатрын Холбооны ерөнхийлөгч Г.Занданшатарын санаачилгаар насанд хүрэгчдийн Азийн аварга шалгаруулах тэмцээн хоёр хоногийн дараа Улаанбаатар хотод эхлэх гэж байна.

Монгол Улсад анх удаа зохион байгуулах энэхүү тэмцээнд Азийн 27 орны 240 гаруй шилдэг шатарчин классик цагийн хяналттай стандарт өрлөөр оюун ухаанаа сорин өрсөлдөж, аваргуудаа тодруулна. Тивдээ хамгийн өндөр чансаатай энэхүү тэмцээн нь 2027 оны Дэлхийн цомын тэмцээний эрх олгох онцгой ач холбогдолтой. Тодруулбал, нээлттэй ангиллын эхний таван байр болон эмэгтэй ангиллын аварга тамирчин ирэх жилийн Дэлхийн цомын тэмцээнд оролцох эрх авах юм. 21 дэх удаагийн ААШТ 10 хоногийн турш “Баянгол” зочид буудалд үргэлжлэх бөгөөд тэмцээний ширээнүүд нь Олон улсын шатрын холбооны стандарт шаардлагад нийцсэн DGT буюу ухаалаг хөлөгтэй. Тухайн өрөгт нүүдэл хийх бүрт хөлөг дээрх мэдрэгч нь нүүдлийг бүртгэж, үзэгчдэд шууд дамжуулах ажээ.

Манай улсад анх удаа болох гэж буй энэхүү нэр хүндтэй тэмцээнд Олон улсын шатрын холбооны ерөнхийлөгч Дворкович Аркадий Владимирович, Казахстаны тэрбумтан Тимур Турлов, Германы тэрбумтан Вадим Розенштэйн тэргүүтэй дэлхийн шатрын лидерүүд Г.Занданшатарын урилгаар Монголд ирэх гэж байна. Олон улсын шатрын холбооны ерөнхийлөгч Дворкович Аркадий Владимирович энэ сарын 29-нд болох шатрын ААШТ-ий нээлтэд оролцоно. Харин Вадим Розенштэйн, Тимур Турлов тэмцээний үеэр хүндэт зочны хувиар ирэх ажээ.