Аваргуудын лигийн финалд дараалан шалгарсан “Пари Сен-Жермен” баг дахин түрүүлсэн тохиолдолд хөгжөөн дэмжигчид, хөлбөмбөгчдийн баярын жагсаалыг Елисейн талбайд явуулахгүй гэж Парис хотын 8 дугаар тойргийн захиргаа мэдэгдлээ.
Энэ сарын 30-ны бямба гарагт болох Аваргуудын лигийн финалын тоглолтод “ПСЖ”, Английн “Арсенал” багууд өрсөлдөнө. Иймээс “Парисын цагдаагийн газар хүмүүсийн аюулгүй байдал, эд хөрөнгийн бүрэн бүтэн байдлыг хамгаалахын тулд шаардлагатай арга хэмжээнүүдийг авч байна” гэж дээрх мэдэгдэлд дурджээ.
Энэ хүрээнд 30-ны 15 цагаас 31-ний 05 цаг хүртэл Елисейн талбай болон зэргэлдээх гудамжнуудад автомашин зогсоохыг хориглоно. Мөн 30-ны өдрийн 17 цагаас 31-ний 05 цаг хүртэл эдгээр гудамж талбайд тээврийн хэрэгслийн хөдөлгөөнийг бүрэн зогсооно гэдгийг хотын захиргаа мэдэгдсэн байна.
Хөл бөмбөгийн хөгжөөн дэмжигчид Францад байнга эмх замбараагүй байдал дэгдээдэг. Тухайлбал, саяхан болсон Францын цомын тэмцээний финалын тоглолтын үеэр Парисын цагдаа нар 35 хүнийг баривчилжээ. Уг тоглолт болохоос нэг хоногийн өмнө “Ницца” багийн олон зуун хөгжөөн дэмжигчид Парист зодоон өдөөсний улмаас 6 хүн гэмтэж бэртсэн байна.
