Хоккейн дэлхийн аварга шалгаруулах тэмцээний хэсгийн шатны сүүлчийн тоглолтод Италийн шигшээ баг Словени улсын багт 1:5 харьцаагаар хожигдсоноор дараагийн улиралд дээд дивизионд тоглох боломжгүй боллоо.

Хожсон багаас Матиц Тёрёк (29 дэх минут), Ян Дрозг (31, 40), Марцел Махковец (48), Жан Езовшек (52) нар гоол оруулсан бол Италийн багийн Фил Пьетрониро (23) хариу гоол хийв.

Ингэснээр Италийн баг 7 тоглолтод 1 оноо авч, В хэсгийн хамгийн сүүлчийн байрыг эзэллээ. Дээд дивизионд үлдэхийн тулд италичууд Словенийн багийг үндсэн цагт хожих ёстой байв. Швейцарт болсон энэ удаагийн хоккейн ДАШТ-ий хэсгийн тоглолтын дүнгээр Италиас гадна Их Британийн баг дээд дивизионоос хасагдаж байна. Энэ хоёр багийн оронд Украин, Казахстаны багууд ирэх онд Германд болох ДАШТ-д оролцоно.

Итали-Словенийн тоглолттой зэрэг болсон өөр нэгэн тоглолтод Германы баг британичуудыг 6:3 харьцаагаар хожсон байна.

Энэ удаагийн ДАШТ-ий хэсгийн шатанд 16 улсын шигшээ багууд хоёр хэсэгт хуваагдан өрсөлдлөө. Хэсэг тус бүрээс шилдэг 4 баг шөвгийн наймд шалгарсан бол хэсэгтээ хамгийн сүүлд орсон хоёр баг II дивизион руу буув.

Өнгөрсөн оны дэлхийн аваргаар АНУ-ын баг шалгарчээ. Харин Орос, Беларусийн багууд 2022 оноос хойш ДАШТ-д оролцохгүй байгаа юм.