Английн аваргаар шалгарсантай нь холбогдуулан Лондоны “Арсенал” клубийн хамт олонд Их Британийн Ерөнхий сайд Кир Стармер баяр хүргэлээ.

“Энэ бол Арсеналын хувьд удаан хүлээсэн 22 жил байлаа. Эцэст нь бид байх ёстой газраа эргэн ирлээ” хэмээн засгийн газрын тэргүүн Х нийгмийн сүлжээний хуудсандаа бичжээ.

Лондоны хойд хэсгийн Холлоуэй-роуд гудамжин дахь Emirates Stadium цэнгэлдэх хүрээлэнгийн орчимд хуран цугларсан тус багийн хөгжөөн дэмжигчид улаан өнгийн алчуур зүүж, баяр хөөрөө илэрхийлэн “Арсенал”-ын уриаг хашгирч байх үед хажуугаар өнгөрч буй автомашинууд дуут дохиогоо хангинуулж байлаа.

Өчигдөр болсон "Борнмут" - "Манчестер Сити" багуудын тоглолт 1:1 харьцаагаар өндөрлөснөөр “Арсенал” баг аваргалах нь тодорхой болсон юм. Учир нь, Английн АШТ дуусахад ганцхан тоглолт үлдээд буй энэ үед арсеналчууд 82 оноотой болсон бол тэмцээний хүснэгтийн хоёрдугаарт бичигдэж байгаа “Манчестер Сити” баг 78 оноо авчээ. Ингэснээр “Ман Сити” баг лондончуудыг гүйцэх боломжгүй болсон юм.

Ийнхүү “Арсенал” баг 2003/2004 оны улирлаас хойш Английн Премьер-лигт анх удаагаа түрүүлж байна. Тус баг Английн аваргаар 14 дэх удаагаа шалгарч байгаа нь энэ бөгөөд эл үзүүлэлтээр тус бүр 20 удаа түрүүлсэн “Манчестер Юнайтед”, “Ливерпүүл” багуудын дараа бичигддэг.

Испанийн иргэн Микел Артета 2019 оноос хойш “Арсенал”-ын ахлах дасгалжуулагчаар ажиллаж байгаа бөгөөд түүний удирдлага дор арсеналчууд Английн цом /2020/, Английн супер цомыг /2020, 2023/ хүртсэн юм.

Удахгүй энэ сарын 30-ны өдөр “Арсенал” баг Аваргуудын лигийн финалд Францын “Пари Сен-Жермен” багтай тоглоно. Лондончууд Европын клубүүдийн хамгийн нэр хүндтэй тэмцээнд түрүүлж байгаагүй юм.