Испанийн аварга шалгаруулах тэмцээний 35 дахь тойргийн тоглолтод “Барселона” баг өөрийн талбайд “Реал Мадрид”-ыг 2:0 харьцаагаар хожсоноор тус тэмцээнд түрүүлэх нь тодорхой боллоо.
"Камп Ноу" цэнгэлдэх хүрээлэнд Улаанбаатарын цагаар 11-ний өглөөний 03 цагт эхэлсэн тоглолтод Маркус Рэшфорд (9 дэх минут), Ферран Торрес (18) нар гоол оруулсан байна.
Ийнхүү “Барселона” баг 91 оноотой болсноор тэмцээн дуусахаас 3 тойргийн өмнө тэмцээний хүснэгтийн хоёрдугаарт бичигдэж буй “Реал”-аас 14 оноогоор хол тасарч, 29 дэх удаагаа Испанийн аваргаар шалгарлаа.
Хоёр багийн тоглолтыг "Эль-Классико" гэж нэрлэдэг бөгөөд 1932 оноос хойш анх удаагаа барсачууд “Реал”-ыг хожсоноор аварга болж байна. Ташрамд дурдахад, “Реал Мадрид” баг хамгийн олон буюу 36 удаа Испанийн АШТ-д түрүүлжээ.
10-нд шилжих шөнө нас барсан “Барселона” багийн ахлах дасгалжуулагч Ханс-Дитер Фликийн эцгийн дурсгалыг хүндэтгэж, нэг минут дуугүй зогссоноор өнөөдрийн тоглолт эхэлсэн байна. Флик 2024 оноос “Барселона”-г дасгалжуулж байгаа бөгөөд түүний удирдлага дор барсачууд ийнхүү хоёр дараалан Испанийн аваргаар шалгарлаа. Мөн Испанийн цомыг хүртэж, хоёр удаа Испанийн супер цомыг өргөсөн байна.
Мөн өмнө нь түүний дасгалжуулсан “Бавариа” баг Аваргуудын лиг, УЕФА-гийн супер цом, клубүүдийн ДАШТ, Германы цомд түрүүлж, Германы аваргаар хоёр удаа шалгарч байжээ.
Одоо “Барселона” баг 36 дахь тойрогт “Алавес” багтай 13-ны өдөр талбайд нь тоглох бол 14-ний өдө “Реал Мадрид” баг өөрийн талбайд "Овьедо" багийг хүлээж авна.
