Беларусийн тамирчдад тавьсан бүх хоригийг цуцлахыг Олон улсын Олимпын хороо /ОУОХ/ пүрэв гарагт зөвлөмж болгосноор тус улсын тамирчид Лос-Анжелес-2028 Олимпын наадмын сонгон шалгаруулах тэмцээн зэрэг олон улсын тэмцээнүүдэд оролцох боломж дахин нээгдэж байна.

“Олон улсын спортын холбоод болон олон улсын спортын арга хэмжээ зохион байгуулагчдын ивээл дор болж буй тэмцээн уралдаанууд, тэдгээрийн дотор багийн тэмцээнүүдэд Беларусийн тамирчдыг оролцуулахтай холбоотой ямарваа хориг хязгаарлалт тавихыг ОУОХ цаашид зөвлөмж болгохгүй” гэж тус холбооны мэдэгдэлд дурджээ.

Харин спортын салбарын албаны хүмүүсийн үзэж байгаагаар, энэ нь зөвхөн зөвлөмж бөгөөд Беларусийн тамирчид тодорхой төрлөөр тодорхой уралдаан тэмцээнд оролцох эсэхийг зохион байгуулагчид болон олон улсын холбоод шийдэх юм. Гэхдээ шийдвэр гаргахдаа ОУОХ-ны зөвлөмжийг эн түрүүнд харгалзан үзэх ёстой. Харин уг зөвлөмж Оросын тамирчдад хамаарахгүй бөгөөд хориг хүчинтэй хэвээр байгаа ажээ.

Оросын арми 2022 онд Украинд халдан довтолсны дараа Оросын ба Беларусийн тамирчдыг олон улсын тэмцээнүүдэд оролцуулахгүй байхыг ОУОХ зөвлөмж болгосон байна. Беларусийн эрх баригчид дайны явцад Оросыг дэмжиж, нутаг дэвсгэрээ Украин руу довтлох түшиц газар болгон ашиглуулсан нь дээрх шийдвэрийг гаргах үндэслэл болжээ.

Харин одоо Беларусийн тамирчид төрийнхөө далбаан дор, төрийн дууллаа эгшиглүүлэн ганцаарчилсан болон багийн төрлөөр олон улсын тэмцээнүүдэд оролцох боломж нээгдэж байна. Беларусийн тамирчдын эрхийг сэргээхэд чиглэсэн ОУОХ-ны шийдвэрийг Беларусийн Үндэсний Олимпын хороо талархан хүлээн авчээ.

ОУОХ-ны шийдвэрийг ОХУ-ын Спортын сайд бөгөөд Оросын Олимпын хорооны тэргүүн Михаил Дегтярев сайшаасан байна. Үүний сацуу тэрбээр хэлэхдээ “Оросын Олимпын хорооны статусыг сэргээх үйл явц илт сунжирч буйн ямар нэгэн үндэслэл шалтгааныг бид олж харахгүй байна” гэлээ. Харин Украины Үндэсний Олимпын хороо дээрх зөвлөмжийг эсэргүүцэж, уг шийдвэртэй холбогдуулан “маш их сэтгэл дундуур” байгаагаа илэрхийлжээ.

Ташрамд дурдахад, World Aquatics буюу Олон улсын усан спортын холбоо дөрөвдүгээр сарын 14-нд Орос, Беларусийн тамирчдыг олон улсын тэмцээнүүдэд төрийнхөө далбаан дор, төрийн дууллаа эгшиглүүлэн оролцохыг зөвшөөрсөн билээ. Мөн өнгөрсөн оны 9 дүгээр сард Олон улсын Паралимпын хорооноос Орос, Беларусийн Паралимпын хороодын статусыг сэргээсэн байна.