Жүдо бөхийн “Их дуулга” ангиллын тэмцээний ээлжит цуврал Тажикстаны Душанбе хотод болж, Монголын баг таван медаль хүртлээ.

Гурав дахь жилдээ болж буй Душанбегийн “Их дуулга”-д 34 орны 240 жүдоч зодоглосон юм. Манай улсаас 17 тамирчин өрсөлдөж хоёр алт, хоёр мөнгө, нэг хүрэл, гурван шагналт байрт шалгарч тэмцээнээ өндөрлүүллээ. Эмэгтэйчүүдийн 63 кг-д гавьяат тамирчин Л.Энхрийлэн, олон улсын хэмжээний мастер Б.Ганхайч нар финалд шалгарсан. Ингэснээр 2022 оноос хойш дөрвөн жилийн дараа монгол тамирчид дахин хосоороо алтан медалийн төлөө шалгарч үлдсэн тохиолдол боллоо. 63 кг-д Б.Ганхайч, 48 кг-д Ж.Анударь нар Душанбегийн “Их дуулга”-ын хошой аварга болсон бол Л.Энхрийлэн, Т.Ариунзаяа нар мөнгө, М.Нандин-Эрдэнэ хүрэл медальтан болов.

Багийн дүнгээр ОХУ тэргүүлж, Тажикстан удаалсан бол Монголын шигшээ гуравдугаар байрт шалгарлаа. Энэ удаагийн тэмцээнд оролцсон 34 орноос 18 нь ямар нэгэн байдлаар медаль хүртэв. Тэгвэл долоон улс алтан медальтай нутаг буцлаа.

Монголын жүдочдын оролцох дараагийн тэмцээн Казахстаны Астана хотод болох “Бариси Их дуулга” байх юм.