“Брайтон энд Хоув Альбион" хөл бөмбөгийн клуб эмэгтэйчүүдийн хөл бөмбөгт зориулсан Европ дахь анхны цэнгэлдэх хүрээлэн барих төлөвлөгөөгөө танилцууллаа.

Ойролцоогоор 100 сая ам.долларын өртгөөр босох уг цэнгэлдэх хүрээлэн нь эмэгтэйчүүдийн багийн байнгын хөл бөмбөгийн талбай нь болох юм. Энэхүү байгууламж “Брайтон” клубийн эмэгтэй хөлбөмбөгчид, ажилтнууд болон хөгжөөн дэмжигчдийн хэрэгцээ шаардлагад тусгайлан нийцүүлсэн дэд бүтэцтэй байх ажээ.

Уг цэнгэлдэх хүрээлэнг Английн Премьер лигт өрсөлддөг эрэгтэйчүүдийн багийн цэнгэлдэх хүрээлэнгийн дэргэд барихаар төлөвлөжээ. Анхны багтаамж нь 10 мянган үзэгчийн суудалтай байх бөгөөд үндсэн цэнгэлдэх хүрээлэнтэйгээ явган гүүрээр холбогдох гэнэ.

Зөвшөөрөл авах ажил хэдийн эхэлсэн бөгөөд тус клуб 2030/31 оны улирал эхлэхэд цэнгэлдэх хүрээлэнгээ албан ёсоор ашиглалтад оруулахаар төлөвлөж байна.

Энэ бол Европт анхны, харин дэлхийд гурав дахь ийм төрлийн төсөл юм. Анхны ийм цэнгэлдэх хүрээлэнг АНУ-д байгуулсан бөгөөд эмэгтэйчүүдийн хөл бөмбөгийн “Канзас-Сити Каррент” клуб хэдийнэ хоёр улирлын турш “Си-Пи-Кей-Си Стэдиум” цэнгэлдэхэд тоглолтуудаа хийж байна. Үүнээс гадна, Америкийн эмэгтэйчүүдийн хөл бөмбөгийн лигийн “Денвер Саммит” баг өөрийн гэсэн талбайг 2028 он гэхэд барьж дуусгахаар төлөвлөж байгаа ажээ.