Энэ жилийн баруун бүсийн хурдан морины уралдаан долоодугаар сарын 24-26-ны өдрүүдэд Завхан аймагт болно.

Засгийн газрын дөрөвдүгээр сарын 22-ны өдрийн 143 дугаар тогтоолоор Нийтээр тэмдэглэх баярын болон тэмдэглэлт өдрүүдийн тухай хуулийн 5.2, Үндэсний их баяр наадмын тухай хуулийн 5.3, 10.18-д заасныг тус тус үндэслэн Завхан аймгийн баяр наадмыг 2026 оны долоодугаар сарын 24-26-ны өдрүүдэд тэмдэглэхээр шийдвэрлэжээ.

Иймд тус аймгийн баяр наадам долоодугаар сарын 11-ний өдөр болохгүй бөгөөд Засгийн газрын тогтоолын дагуу баруун бүсийн хурдан морины уралдаантай хамтатган зохион байгуулах юм. Аймгийн цол олгох асуудлыг Завхан аймгийн Уяачдын холбоо, Бөхийн холбоотой хамтран шийдвэрлэх аж.

Завхан аймаг энэ жил тав дахь удаагаа бүсийн хэмжээний томоохон наадам зохион байгуулах гэж байна. Тодруулбал, 1995 онд баруун бүсийн “Сар хайрхан”-ы наадам, 2009 онд “Очирваанийн хурд” баруун бүсийн уралдааныг Тэлмэний хөндийд зохион байгуулж байжээ. Мөн 2013 онд аймгийн 90 жилийн ой, 2023 онд 100 жилийн ойтой тус тус хамтатган баруун бүсийн хурдан морины уралдааныг зохион байгуулсан байна.

Энэ жилийн баруун бүсийн хурдан морины уралдааныг зохион байгуулалтын өндөр түвшинд бэлтгэн явуулах талаар аймгийн Засаг даргын Тамгын газраас мэдээллээ.