"Дарханы төмөрлөгийн үйлдвэр” ХХК нь нийгмийн хариуцлагын хүрээнд аймгийн Нэгдсэн эмнэлгийн тусламж, үйлчилгээний чанар, хүртээмжийг сайжруулах зорилгоор 1.1 тэрбум төгрөгийн үнэ бүхий 7 нэр төрлийн тоног төхөөрөмжийг санхүүжүүлэх шийдвэрийг гаргалаа.
Энэ хүрээнд Эрүүл мэндийн газрын дарга Б.Эрдэнэтулга, Нэгдсэн эмнэлгийн дарга Б.Мөнхбат, Дарханы төмөрлөгийн үйлдвэрийн захирал Б.Чагнаадорж хамтын ажиллагааны санамж бичигт гарын үсэг зурав.
Энэхүү санхүүжилтийн хүрээнд эмнэлгийн оношилгоо, эмчилгээний чадавхыг нэмэгдүүлэхэд шаардлагатай дараах тоног төхөөрөмжийг худалдан авах боломж нээгдэж байна.
Уг хөрөнгө оруулалтыг хэрэгжүүлснээр Дархан-Уул аймаг төдийгүй төвийн бүсийн иргэдэд үзүүлэх эрүүл мэндийн тусламж, үйлчилгээний чанар, хүртээмжийг дээшлүүлэхэд чухал хувь нэмэр оруулна хэмээн Б.Мөнхбат онцоллоо.
Өмнө нь Нэгдсэн эмнэлэгт нярайн зулай, хэвлий, тархи, зүрх судасны оношилгоо хийх орчин үеийн хүүхдийн эхо датчик бүхий аппарат дутагдалтай байсан бол энэхүү санхүүжилтийн хүрээнд уг хэрэгцээг хангах боломж бүрдэж байна.
Ингэснээр Улаанбаатар хотыг зорьж, өндөр зардал болон цаг хугацаа зарцуулан оношлуулах урсгал багасч, бодит үр дүн гарна. Мөн гемодиализын иж бүрэн аппаратыг шийдвэрлэснээр Нэгдсэн эмнэлэгт эмчлүүлж буй бөөрний архаг дутагдалтай өвчтөнүүдийн хүлээгдэл, дараалал мэдэгдэхүйц буурах боломж бүрдэх юм.
