"Дархан марафон-2026" бүх нийтийн гүйлтийг тавдугаар сарын 30-нд зохион байгуулахаар бэлтгэл ажлыг эхлүүлжээ. Өнгөрсөн онд “Бид Дархандаа хайртай” уриан дор 12 мянга гаруй иргэн оролцсон уг марафоныг энэ жил 1, 3, 5, 10, 21, 42 км-ийн зайд зохион байгуулна.

Тэмцээнийг УИХ-ын гишүүн Б.Жавхлан, аймгийн ЗДТГ, Дархан сумын ЗДТГ, БТСГ-тай хамтран зохион байгуулна. Ажлын хэсгийг Дархан сумын Засаг дарга Т.Тулгаа ахалж байна.

Сонирхогчид болон мэргэжлийн тамирчдын дунд болох уг тэмцээнийг зөвхөн Дарханы иргэдээр хязгаарлахгүй, олон хотыг хамарсан тэмцээн болгон өргөжүүлэх зорилт тавьж байгааг зохион байгуулагчид онцолж байна. Сүүлийн арван жилд коронавирус болон бусад нөхцөл байдлын улмаас 4-5 удаа цуцалж байжээ.

Марафоныг зохион байгуулснаар хүүхэд, залуус болон иргэдийн спортоор хичээллэх идэвхийг нэмэгдүүлэх, мэргэжлийн тамирчдад ур чадвараа сорих, чансаагаа тогтоох боломж олгох, түүнчлэн гэр бүлийн оролцоог нэмэгдүүлж эерэг нийгмийн уур амьсгалыг бүрдүүлэхийг зорьж байна.

Тэмцээнийг орчин үеийн дэвшилтэт технологид тулгуурлан, зай тус бүрийн гүйлтийг тусгай программын тусламжтайгаар шүүн явуулна.