Хос гулгалтын төрөлд Олимпын аварга болсон Японы тамирчид болох Рикү Миүра, Рюичи Кихара нар энэ улирлыг дуусгаад спортын замналаа өндөрлүүлэхээр шийдсэнээ албан ёсоор мэдэгджээ. Тэд 2019 оноос хойш хамтдаа гулгаж байгаа юм.
"Бид энэ улирлын төгсгөлд зодог тайлахаар шийдлээ. Хэдийгээр бидний тэмцээн уралдаанд оролцох замнал дуусаж байгаа боловч бид харамсах зүйлгүйгээр бүх хүч чадлаа дайчилсан гэдгээ мэдэрч байна. Туулж өнгөрүүлсэн бүх зүйлээрээ бахархаж байна" хэмээн тамирчид нийгмийн сүлжээнд бичжээ.
Тэд зодог тайлсныхаа дараа Японд уран гулгалтын спортыг хөгжүүлэхэд хувь нэмрээ оруулахаар шийджээ. "Бид шинэ сорилтод бэлэн байна. Японд хос гулгалтыг улам бүр түгээмэл болгохын төлөө хувь нэмрээ оруулахыг хүсэж байна" гэж тэд бичсэн байна.
Миүра, Кихара нар 2026 оны Милан-Кортинагийн өвлийн Олимпын наадмаас алтан медаль хүртэж, Японы түүхэнд хос гулгалтын төрлөөр олимпын аварга болсон анхны хос болсон юм. Тэд богино үзүүлбэрийн дараа тавдугаар байрт жагсаж байсан боловч чөлөөт үзүүлбэрээрээ Оросын А.Мишина, А.Галлямов нарын эзэмшиж байсан дэлхийн дээд амжилтыг шинэчлэн тогтоож, алтан медалийн тавцанд гарсан юм.
Өдгөө 33 настай Кихара, 24 настай Миүра нар мөн Олимпын наадмын багийн тэмцээнээс хоёр удаа мөнгөн медаль, ДАШТ-ээс хоёр алт, хоёр мөнгөн медаль хүртжээ.
Эх сурвалж: Forbes
