“Бавариа” баг ням гарагт “Штутгарт”-ыг 4:2 харьцаагаар хожсоноор Герман улсын аварга шалгаруулах тэмцээнд 35 дахь удаагаа түрүүллээ.

30 тойргийн дараах байдлаар баваричууд 79 оноо авч, хоёрдугаарт бичигдэж буй Дортмундын “Боруссиа” багаас 15 оноогоор хол тасарснаар тэмцээн дуусахаас дөрвөн тойргийн өмнө ийнхүү аваргалж байна.

Түүнээс гадна, Бельгийн дасгалжуулагч Венсан Компани-гийн удирдсан тус баг Германы АШТ дуусахаас 5 тойргийн өмнө “Санкт-Паули” багийн талбайд хийсэн тоглолтын үеэр таван бөмбөг оруулснаар энэ улиралд оруулсан гоолын тоо нь 105 болж, 1971/72 оны улиралд 101 гоол оруулсан дээд амжилтаа шинэчилсэн юм. Энэ удаад “Штутгарт”-ын хаалганд 4 бөмбөг оруулснаар гоолын тоо 109-д хүрлээ. Энэ улиралд зөвхөн “Аугсбург” баг л мюнхенчүүдийг хожсон байна. Баваричууд одоогоор 30 тоглолтод 25 хожиж, 109 гоол оруулж, 29 гоол алдаад байгаа нь том амжилт юм.

УАШТ-нд 4 тоглолтын өмнө түрүүлснээс гадна дахиад хоёр том амжилтад хүрэх боломж Мюнхений багт бий. Эхнийх нь, клубийн түүхэнд гурав дахь удаагаа требл хийж, УАШТ, Германы цом, Аваргуудын лигт түрүүлэх явдал юм.

Нөгөөтэйгүүр, нэг улиралд оруулсан гоолын тоогоор дэлхийн дээд амжилт тогтоох боломж бий. Одоогоор “Реал Мадрид” баг 2012 онд Испанийн АШТ-ний нэг улирлын 38 тоглолтод 121 гоол, 1930/31 оны улиралд “Астон Вилла” баг 42 тоглолтод 128 гоол оруулсан нь дээд амжилт юм.