Монголын Худалдаа Аж Үйлдвэрийн Танхим, Монголын Шатрын Холбоо хамтран зохион байгуулсан корпорацуудын аварга шалгаруулах “Алтан Бэрс” багийн тэмцээний медальтнууд тодорчээ.

Монгол Улсын ТОП-100 аж ахуйн нэгжүүдийн төлөөлөл болсон шилдэг 30 баг өрсөлдсөн энэхүү тэмцээнд олон улсын мастер Г.Амартүвшингээр ахлуулсан “Голомт” банкны баг түрүүлж, “Алтан Бэрс”-ийг өргөжээ. Ингэснээр тэд корпорацуудын дэлхийн аварга шалгаруулах багийн тэмцээнд Монгол Улсаа төлөөлөн оролцох эрхтэй болов. Харин олон улсын мастер Х.Өлзийхишиг ахлагчтай “Цахилгаан дамжуулах үндэсний сүлжээ” компанийнхан удааллаа. Тэд өнгөрсөн жил түрүүлсэн бөгөөд аваргаа хамгаалах зорилготой байсан юм. Харин хүрэл медалийг ФИДЕ мастер Х.Баясгалан ахлагчтай, их мастер Б.Гүндавааг эгнээндээ нэгтгэсэн “Шунхлай” компанийн баг эзэлсэн бол “Цэцэн Майнинг энержи”, “Мөрөн Вилла”, “Монос” групп айрагдсан байна.

Тэгвэл тус тэмцээний нэгдүгээр ширээнд “Платинум Ланд”-ын тамирчин, олон улсын мастер С.Чингүүн, хоёрдугаар ширээнд “Шунхлай”-гийн их мастер Б.Гүндаваа, гуравдугаар ширээнд “Шунхлай”-гийн тамирчин, спортын мастер А.Эрхэмбаяр, дөрөвдүгээр ширээнд “Цахилгаан дамжуулах үндэсний сүлжээ”-гийн тамирчин, олон улсын мастер Б.Баярмаа нар түрүүлсэн байна.