Монголын Сагсан Бөмбөгийн Холбооноос өсвөрийн тамирчид болон дотоодын сагсан бөмбөгийн спортын хөгжлийг дэмжих зорилгоор “Хүслийн цом” тэмцээнийг анх удаа зохион байгуулж байна.

Анхдугаар тэмцээнд улсын хэмжээнд үйл ажиллагаа явуулж буй төрийн өмчийн ерөнхий боловсролын сургуулийн IX-XII ангийн сурагчдаас бүрдсэн эрэгтэй баг өрсөлдөж буйгаараа онцлогтой. Тэмцээнд Монгол Улсын 21 аймаг, есөн дүүргээс шалгарсан шилдэг 32 баг оролцож, маргааш аваргуудаа тодруулах гэж байна. Энэхүү тэмцээний нэгэн чухал онцлог нь улсын хэмжээнд өргөн хүрээг хамруулснаас гадна стандартад нийцсэн талбайд, олон улсын дүрмийн дагуу зохион байгуулж байгаа явдал юм. Мөн ерөнхий боловсролын сургуулийн биеийн тамирын багш, дасгалжуулагчдыг дэмжих зорилгоор багийн амжилтад дүйцэхүйц мөнгөн шагналыг дасгалжуулагч багш нарт олгож буйгаараа ач холбогдолтой.

Тэмцээнд түрүүлсэн багийг 25, мөнгөн медальтныг 20, хүрлийг 15, IV байрыг 10 сая төгрөгөөр мялаана. Мөн баг нь байр эзэлсэн дасгалжуулагчдыг дээрх үнийн дүнтэй мөнгөн шагналаар шагнахаас гадна аварга багийн харьяа аймаг, дүүргийн спортын хороог сагсан бөмбөгийн иж бүрэн хос шийт бэлэглэх ажээ.

Сагсан бөмбөг сонирхогч хүүхэд, залуус маргааш 17:00 цагт “М банк арена”-д медалийн төлөөх тоглолтуудыг үзэх боломжтой.