Аваргуудын лигийн тэмцээний шөвгийн наймын эхний тоглолтод Германы “Бавариа” баг Испанийн “Реал” багийг 2:1 харьцаагаар хожлоо.

Мадрид хотын "Сантьяго Бернабеу" цэнгэлдэх хүрээлэнд болсон уг тоглолтод Луис Диас (41 дэх минут), Харри Кейн (46) нар гоол оруулсан бол “Реал”-ын Килиан Мбаппе 74 дэх минутанд хариу гоол хийв. Ийнхүү баваричууд Аваргуудын лигт 2012 оноос хойш анх удаагаа “Реал”-ыг буулган авлаа. Тухайн үед Мюнхений баг хагас шигшээгийн эхний тоглолтод 2:1-ээр хожсон боловч хариу тоглолтод 1:2-оор хожигдож, торгуулийн цохилтоор /3:1/ финалд шалгарч байжээ.

Ташрамд дурдахад, энэ удаад “Бавариа”-гийн хаалгач Мануэл Нойер Аваргуудын лигийн тэмцээнд нэг багийн гарааны бүрэлдэхүүнд 136 дахь удаагаа гарснаар уг үзүүлэлтээр Лионел Месситэй зэрэгцжээ. Испанийн хаалгач Икер Касильяс хамгийн олон удаа буюу 149 удаа гарааны бүрэлдэхүүнд багтсан байна.

Аваргуудын лигийн тэмцээний өөр нэгэн тоглолтод Английн “Арсенал” баг Португалын “Спортинг”-ийг 1:0 харьцаагаар хожсон байна. Тоглолтын II үеийн нэмэлт цагт Кай Хаверц цорын ганц гоолыг оруулжээ.

Хариу тоглолтууд 15-ны өдөр Мюнхен, Лондон хотуудад болно.

Аваргуудын лигийн тэмцээн бол Европын клубүүдийн дунд болдог хамгийн гол тэмцээн юм. Өнгөрсөн улиралд Францын “Пари Сен-Жермен” баг түрүүлсэн бол "Реал" хамгийн олон удаа буюу 15 удаа аваргалсан байна.

Эх сурвалж: TASS