Монгол Улсын нийслэл Улаанбаатар хотын “Аса арена”-д болж буй боксын насанд хүрэгчдийн Азийн аварга шалгаруулах тэмцээний хагас шигшээ тулаанууд өнөөдрөөс эхэллээ.

Манай улсаас хагас шигшээд таван тамирчин шалгарч үлдсэнээс хоёр нь мөнгөн медалийн тулаанаа өнөөдөр хийв. Тодруулбал, эмэгтэйчүүдийн 60 кг-д олон улсын хэмжээний мастер М.Намуун Энэтхэгийн Прияа Прияатай тулалдаж, хажуугийн шүүгчдийн санал нэгтэй шийдвэрээр буюу 0:5-аар ялагдсанаар хүрэл медаль хүртэж байна.

Тэгвэл эрэгтэйчүүдийн 55 кг-д олон улсын хэмжээний мастер Х.Билгүүнсайхан дэлхийн аварга, Казахстаны шилдэг боксчин Махмуд Сабырханыг хажуугийн шүүгчдийн санал нэгтэй шийдвэрээр буулган авснаар финалд өрсөлдөх эрхтэй боллоо.

Энэ удаагийн Азийн аварга шалгаруулах тэмцээнд 25 орны 240 гаруй боксчин тулалдаж буй. Тэгвэл хагас шигшээд Энэтхэгийн 16, Казахстаны 13, Узбекистаны 11, Хятадын 8, Монголын 5, Тайланд, Япон, Тайванийн тус бүр 4, Хойд Солонгос, Тажикстан, Йорданы тус бүр 3, Солонгосын 2, Филиппин, Туркменистаны тус бүр 1 тамирчин шалгараад байна.