Үйлчлүүлэгч иргэдийн цаг хугацааг хэмнэсэн, иргэн төвтэй үйлчилгээ үзүүлж байгааг үнэлэн Баянхонгор аймгийн Нэгдсэн эмнэлгийн хамт олонд ЭМЯ-наас Талархал гардуулжээ.

Баянхонгор аймгийн Нэгдсэн эмнэлэг орон нутгийн эрүүл мэндийн байгууллагуудыг манлайлан цахим шийдлийг анхлан нэвтрүүлж, эмнэлгийн дараалал, хүлээгдлийг бодитойгоор бууруулж, эмнэлгийн цаг товлох үйлчилгээ 18000119-д холбогдож цахим дэвшлийг нэвтрүүлээд байгаа юм.

Улаанбаатар хотод зохион байгуулсан “Эрүүл мэндийн салбарын удирдах ажилтны зөвлөгөө”-ний үеэр төрийн бодлого шийдвэрийг хэрэгжүүлэхэд хувь нэмэр оруулж, иргэдийн сэтгэл ханамжийг нэмэгдүүлж, эрүүл мэндийн үйлчилгээг ил тод, шуурхай болгоход үнэтэй хувь нэмэр оруулж буйг ийнхүү сайшаажээ.

Баянхонгор аймаг 2025 оныг "Эрүүл мэндийг дэмжих жил" болгон зарласан. Нэрлэсэн жилийн хүрээнд эмнэлгийн тусламж үйлчилгээний чанар, хүртээмжийг сайжруулах, нийгмийн эрүүл мэндийн тусламж үйлчилгээг хөгжүүлэх, эрүүл мэндийн салбарын хүний нөөцийг чадавхжуулах зорилтын хүрээнд 79 ажлыг Эрүүл мэндийн яам, Эрүүл мэндийн хөгжлийн төвтэй хамтран хэрэгжүүлсэн байна.

Мөн Нэгдсэн эмнэлгийн амбулаторийг улсын төсвийн 9.5 тэрбумын төсөвт өртгөөр барьж байгуулан, улсын жишиг байдлаар тохижуулахад орон нутгийн төсвөөс 3 тэрбумын хөрөнгө оруулалт хийж, нэн хэрэгцээтэй тавилга эд хогшил, багаж тоног төхөөрөмжөөр бүрэн ханган ашиглалтад оруулжээ.

Амбулаторийн ачааллыг тэнцвэржүүлж, иргэд үйлчилгээ авахдаа гурван шатлалтай бүртгэлд хамрагддаг байсныг хоёр шатлалтай болгож, цахим үйлчилгээг мөн сайжруулсан байна. Амбулаторийн эмчийн цаг товлолт үйлчилгээг иргэн өөрөө ирэхгүйгээр 18000119 дугаарт холбогдож, амбулаторийн төрөлжсөн мэргэжлийн эмч нарт үзүүлэх цаг авах боломж бүрдэж, үйлчлүүлэгчид хүлээгдэл ихтэй байдаг мэдрэл, дотрын кабинетын тоог нэмэгдүүлжээ.

Мөн лабораторийн тусламж үйлчилгээнд шинэ дэвшилтэт технологийн аппарат анализаторуудыг нэвтрүүлж, шинжилгээний төрөл үзүүлэлтүүдийг нэмсэн төдийгүй лабораторийн тусламж үйлчилгээний шинжилгээ хүлээгддэг, яаралтай шинжилгээний үед дуудагддаг байсныг өөрчилж, эмч лаборантуудыг 08-17 цаг, 17-24 цаг хүртэл 2 ээлжээр ажиллуулдаг болсон байна.