Английн “Манчестер Сити” багт тоглодог Португалын хөлбөмбөгчин Бернарду Силва 2025/26 оны улирлын төгсгөлөөр тус багаас явах гэж байгаа тухай “МанСити”-гийн туслах дасгалжуулагч Пепейн Лейндерс мэдээллээ.
Өмнө нь энэ тухай инсайдер мэдээлэгч Фабрицио Романо нийгмийн Х сүлжээний хуудсандаа мэдээлэхдээ “өдгөө 31 настай багийн ахлагч Силва гэрээгээ сунгахгүй бөгөөд ирэх зун чөлөөт агент болж, багаа орхин явна. Одоо Силва болон түүний ойрын хүрээний хүмүүс бусад клубээс ирж буй саналуудыг судалж үзнэ” гэжээ.
“Бернарду Силва бол ер бусын хүн. Тэрбээр тоглолтын явцыг хянаж, бөмбөгийг эзэмшиж, тоглолтыг удирдаж, шийдвэр гаргахдаа онцгой нэгэн” гэж Лейндерс ярилаа.
Силва 2017 оны зунаас хойш “МанСити”-д тоглож байгаа бөгөөд гэрээний хугацаа нь улирлын төгсгөлөөр дуусах юм. Клубийн бүрэлдэхүүнд тэрбээр нийтдээ 450 тоглолтод оролцож, 76 гоол оруулжээ. Өнгөрсөн хугацаанд Английн аваргаар 6 удаа шалгарч, Аваргуудын лиг, УЕФА-гийн Супер цом, клубүүдийн ДАШТ-д түрүүлж, Английн цомыг 2 удаа, Английн Супер цомыг 3 удаа, Английн лигийн цомыг 5 удаа хүртсэн байна.
Харин Португалын шигшээ багийн бүрэлдэхүүнд хагас хамгаалагчийн хувиар 107 тоглолтод оролцож, 14 гоол оруулжээ. Мөн Үндэстнүүдийн лигт 2 удаа түрүүлсэн байна.
