С.Жамбалжамц мэргэжлийн дугуйчдын дээд ангиллын классик уралдаан Бельгийн “Tour of Flanders”-д уралдсан анхны монгол тамирчин боллоо.
Испанийн “Burgos Burpellet BH” мэргэжлийн багийн бүрэлдэхүүнд уралдаж байгаа тэрбээр энэ уралдааны 278.2 км замын эхний хагаст нийт тамирчдыг тэргүүлэн толгойн хэсэгт уралдаж, Монгол Улсаа дэлхийд сурталчлав. Уралдааны шууд дамжуулсан “EURO SPORT”-ын тайлбарлагчид “Монголын тамирчин Сайнбаярын Жамбалжамц 110 дахь удаагаа болж буй энэхүү нэр хүндтэй уралдаанд оролцсон анхны монгол дугуйчин боллоо. Маш өндөр түвшинд, маш амжилттай оролцож байна” хэмээн онцолжээ. Манай тамирчны тухайд 153 дахь км-ээс уралдааныг орхисон байна.
Энэхүү чулуун зам, богино огцом өгсүүрүүдээрээ алдартай “Spring Classic” нь хаврын улирлын таван “Monument” уралдааны хоёр дахь нь бөгөөд Milan-San Remo-ын дараа ордог. “Ronde” хэмээн Бельгид нэрлэдэг уг уралдааныг анх 1919 онд зохион байгуулсан. Нийт 270 км зам туулах бөгөөд 10 гаруй ангилалтай өгсүүр, хэд хэдэн чулуун хэсэгтэйгээрээ онцлог бөгөөд Олон улсын дугуйн холбооны дэлхийн цувралын хамгийн хэцүү замтайд зүй ёсоор тооцогдоно. Замын хүндрэлээс гадна бороотой, хүчтэй салхитай хүндхэн цаг агаарт уралдсан тамирчдаас 54 нь замаа дуусгаж чадсангүй.
