Монголын нийслэл Улаанбаатар хотод гуравдугаар сарын 28-наас дөрөвдүгээр сарын 11-ний өдрүүдэд боксын Ази тивийн аварга шалгаруулах тэмцээн болно. Энэ бол тивийн гол тэмцээнүүдийн нэг бөгөөд энэ удаад онцгой түвшний статустайгаар  явагдана.

Энэ бол Олон улсын Олимпын хорооноос хүлээн зөвшөөрсөн World Boxing бүтцийн ивээл дор явагдах тивийн хэмжээний хамгийн эхний том тэмцээн бөгөөд зөвхөн ААШТ төдийгүй Олимп хүртэлх замд бий болж буй дэлхийн боксын шинэ тогтолцооны гарааны тухай яригдаж байна.

Шинэ ААШТ- Боксын шинэ эриний эхлэл  

ААШТ-2026 бол World Boxing холбооны дэлхийн хуанлид тусгагдсан, шинэ системээр явуулах эхний том тэмцээнүүдийн нэг юм. Дэлхийн бокс хагаран бутарсны дараах энэ үед World Boxing холбоо Олимпын наадмын боксыг хариуцаж байгаа юм. Тэгэхээр Улаанбаатарт болох энэ удаагийн тэмцээн бол зөвхөн тивийн хэмжээний тэмцээнүүдийн эхлэл төдийгүй Олимпын шинэ үеийн бүрэлдэхүүн хэсэг мөн.

Түүнээс гадна энэ бол чансааны оноо олгох анхны том тэмцээн, элит боксыг төлөвшүүлэх чухал үе шат, Олимпын сонгон шалгаруулалтын өмнө сонголт үнэлгээ хийх талбар юм.

Тэмцээний цар хүрээ, хөтөлбөр

Улаанбаатар-2026 ААШТ хоёр долоо хоногийн турш явагдах гэж байгаа нь түүний хамрах хүрээг илтгэж байна. Elite ангиллын уг тэмцээнд дээд түвшний ур чадвартай насанд хүрсэн боксчид оролцоно.

Монголын тал ч тус тэмцээнд нухацтай бэлтгэж байна. Тухайлбал, багууд дасан зохицох, хоорондоо спарринг хийхэд зориулан 3 дугаар сарын 15-27-ны хооронд олон улсын бэлтгэлийн лагерийг ажиллуулж байгаа ажээ.

Тэмцээний ач холбогдол

Sports.tj цахим хуудсанд дүгнэн бичсэнээр, энэ удаагийн ААШТ-ний үнэ цэн бол зөвхөн медаль биш бөгөөд хэд хэдэн чухал үүргийг гүйцэтгэнэ.

1. Чансаа тогтоох. Тэмцээний дүн нь World Boxing-гийн шинэ тогтолцоон дахь боксчдын чансаанд нөлөөлнө

2. Томоохон тэмцээнүүдийн өмнөх сонгон шалгаруулалт. Улаанбаатар-2026-тай адил тэмцээнүүдийн үеэр World Boxing-оос зохион байгуулах ДАШТ, Дэлхийн цомын болон Олимпын мөчлөгийн тэмцээнүүдэд оролцох тамирчдын нэрс тодорхой болдог.

3. Олимпын өмнөх сорилго. Хэдийгээр энэ тэмцээний дүнгээр Олимпын эрх олгохгүй боловч Лос-Анжелес-2028 Олимпын наадмын зам дахь гол чиг баримжаа юм.  

Тажикистаны шигшээ багийн хувьд энэ удаагийн ААШТ бол оны гол гараануудын нэг юм. Учир нь, Азийн шилдэг боксчидтой гар зөрүүлж, шинэ тогтолцоонд дассан эсэхээ харуулах, 2028 оны Олимп өөд тэмүүлэх их замын гараагаа эхлүүлэх гээд олон талын ач холбогдолтой.   

Эх сурвалж: SPORTS.tj