Узбекистаны чөлөөт бөхийн холбооноос энэ сарын 27-нд жин жингийн шилдгүүдийн PWL 11 халз барилдааныг зохион байгуулах гэж байна.

Ташкент хотын "Хумо арена" болох тус барилдаанд Монгол, ОХУ, Азербайжан, Япон, Кирги, Узбекистан, Энэтхэг, Канад зэрэг орны шилдгүүд тулах аж. Манай улсаас дэлхийн аварга шалгаруулах тэмцээний мөнгө, хүрэл, ААШТ-ий хошой мөнгөн медальт, Азийн наадмын аварга, гавьяат тамирчин Т.Тулга барилдана. Түүний өрсөлдөгч нь дэлхийн аварга шалгарууах тэмцээний хүрэл медальт, Узбекистаны бөх Умидхон Жалолов юм.

Хоёр бөх 70 кг-ын жинг барилдах бөгөөд энэ нь тэдний тав дахь удаагийн уулзалт аж. Тэд өмнө нь дөрвөн удаа таарахад Т.Тулга гуравт нь ялжээ. Хамгийн сүүлд 2023 онд Бишкект болсон дэлхийн чансааны тэмцээний шөвгийн наймд хоорондоо таарахад Т.Тулга 6:5-аар ялжээ. Үүнээс өмнө ААШТ-д Т.Тулга 5:2-оор, 2022 оны дэлхийн чансааны тэмцээний хагас шигшээд 5:1-ээр ялж байв. Харин анх 2022 онд Истанбулд болсон дэлхийн чансааны тэмцээний хүрэл медалийн төлөөх барилдаанд 5:4-өөр Жалалов ялсан байдаг. Сүүлийн гурван барилдаанд дараалан ялсан Т.Тулга энэ удаа ялах эсэх нь анхаарал татаж байгаа юм.

Халз барилдаан зохион байгуулах жин болон барилдах бөхчүүдийг танилцуулъя.

61 кг: Чермен Тавитов /ОХУ/-Омурбек Асан Уулу /Киргиз/

65 кг: Ибрагим Ибрагимов /ОХУ/-Сужеет Калкал /Энэтхэг/

Абасгаджи Магомедов /ОХУ/-Пеймэн Биабэни /Канад/

70 кг: Т.Тулга /Монгол/-Умидхон Жалолов /Узбекистан/

74 кг: Заурбек Сидаков /ОХУ/-Кота Такахаши /Япон/

92 кг: Арслан Багаев /ОХУ/-Абубакр Абакаров /Азербайжан/

76 кг эм: Айпери Медет Кизи /Киргиз/-Юүка Кагами /Япон/