Ираны Хөл бөмбөгийн холбоо ирэх зун болох дэлхийн аварга шалгаруулах тэмцээний хэсгийн шатны гурван тоглолтыг АНУ-аас Мексик рүү шилжүүлэх асуудлыг Олон улсын хөл бөмбөгийн холбоотой (ФИФА) хэлэлцэж байгаа тухайгаа мэдэгджээ.
Аюулгүй байдлын шалтгаанаар ийм хүсэлт гаргасан гэж Ираны Хөл бөмбөгийн холбооны ерөнхийлөгч Мехди Таж мэдэгдсэнийг Мексикт суугаа Ираны Элчин сайдын яам Х нийгмийн сүлжээний хуудсандаа мэдээлсэн байна.
“АНУ-ын Ерөнхийлөгч Дональд Трамп Ираны шигшээ багийн аюулгүй байдлыг баталгаажуулж чадахгүй гэдгээ тодорхой мэдэгдсэн тул бид АНУ руу явахгүй нь тодорхой. Бид дэлхийн аваргын тоглолтуудыг Мексикт явуулах талаар ФИФА-тай хэлэлцээ хийж байна” гэж Мехди Таж хэлжээ.
Ираны шигшээ баг ДАШТ-ийн хэсгийн шатанд Шинэ Зеланд, Бельгийн багуудтай Лос-Анжелест, Египетийн багтай Сиэтл хотод тоглох ёстой. Ираны шигшээ баг Аризона муж улсад Тусон хотод байрлах аж.
Д.Трамп хэд хоногийн өмнө мэдэгдэхдээ, Иран улс ДАШТ-д оролцож болох боловч шигшээ багийнх нь тоглолтыг АНУ-д зохион байгуулах нь "тэдний амь нас, аюулгүй байдлын үүднээс дэмий” байж магадгүй гэсэн байна.
Харин Ираны эрх баригчид хоёрдугаар сарын сүүлчээр АНУ, Израилын эхлүүлсэн дайны улмаас ирэх дэлхийн аварга шалгаруулах тэмцээнийг “бойкотлох” боломжийг хэлэлцэж байгаа гэдгээ мэдэгджээ. Гэхдээ албан ёсны шийдвэр одоогоор гараагүй байна.
2026 оны хөл бөмбөгийн дэлхийн аварга шалгаруулах тэмцээн зургаадугаар сарын 11-нээс долоодугаар сарын 19-ний хооронд АНУ, Канад, Мексик улсуудад болно.
Эх сурвалж: TASS
