"Miami Heat" багийн төвийн тоглогч Бэм Адебайо “Washington Wizards” багийг талбайдаа 150-129 харьцаагаар хожсон тоглолтод 83 оноо авснаар АНУ-ын Үндэстний сагсан бөмбөгийн холбооны /NBA/ түүхэнд нэг тоглолтод хамгийн олон оноо авсан хоёр дахь сагсанбөмбөгч боллоо.
Өдгөө 28 настай тэрбээр эхний үед 31 оноо авч, 2006 онд нэг тоглолтод 81 оноо авч байсан Коби Брайантын амжилтыг эвдэж, нэг тоглолтод хамгийн олон оноо авсан тоглогчдын жагсаалтын хоёрдугаарт бичигдэж эхлэлээ. Харин Уилт Чемберлэний 1962 онд тогтоосон 100 онооны амжилт эвдэгдээгүй хэвээр байна.
Б.Адебайо мөн "Miami Heat" багийн нэг тоглолт болон нэг үед авсан онооны дээд үзүүлэлтийг шинэчилжээ. Тус багийн өмнөх рекордыг 2014 онд Леброн Жеймс 61 оноо авснаар тогтоож байв. Б.Адебайогийн өмнөх хувийн дээд амжилт нь 2021 оны нэгдүгээр сарын 23-нд "Brooklyn Nets" багийн эсрэг хийсэн тоглолтод авсан 41 оноо байсан юм.
Тэрбээр мягмар гаргийн тоглолтод 42 минут талбайд тоглохдоо талбайгаас 43 удаа шидсэнээс 20-ыг нь, 3 онооны шугамаас 22 удаа шидсэнээс 7-г нь оруулжээ. Мөн 43 чөлөөт шидэлтийн 36-г нь амжилттай гүйцэтгэж, есөн удаа самбараас бөмбөг авсан байна.
Б.Адебайо мөн NBA-ийн нэг тоглолтод хамгийн олон торгуулийн шидэлт амжилттай гүйцэтгэсэн болон хамгийн олон торгуулийн шидэлт хийсэн дээд амжилтыг тогтоожээ.
"Miami Heat" баг дараалан зургаа дахь хожлоо байгуулж, улирлын хамгийн урт ялагдалгүй цувралаа давтлаа. Тус баг талбайдаа 22 хожил, 11 хожигдолтой болсон байна.
Reuters
