Ази тивийн хөл бөмбөгийн аварга шалгаруулах тэмцээний /AFC Women's Asian Cup/ үеэр төрийнхөө дууллыг дуулахаас татгалзсан Ираны хөл бөмбөгийн эмэгтэйчүүдийн шигшээ багийн таван тоглогчид орогнох эрх олгосон гэдгээ Австралийн эрх баригчид мэдэгджээ.

Тэд Австралид болж буй уг тэмцээнд эхний тоглолтоо хийхийн өмнө Ираны төрийн дууллыг дуулахаас татгалзсаны дараа эх орондоо буцан очвол аюул учирч болзошгүй гэж үзэн нутаг буцахгүй байхаар шийдсэн байна.

Таван тамирчин бүсгүй зочид буудлаасаа гарч, цагдаад хандан тусламж хүссэн бөгөөд одоо аюулгүй газар байгаа гэж Австралийн хэвлэлүүд даваа гаргийн өглөө мэдээлжээ.

Дараагийн тоглолтуудад (нийт гурван тоглолт хийсэн) тэд төрийн дууллаа дуулж, эх орончдын үзүүлдэг дохио зангааг үзүүлсэн нь эхний тоглолтын дараа тамирчдын болон тэдний гэр бүлийнхэнд заналхийлэл ирсэн байж болзошгүйг илтгэж магадгүй гэж олон нийт үзэж байна.

Ираны хөл бөмбөгийн эмэгтэйчүүдийн шигшээ баг АНУ, Израилын цэргийн ажиллагаа эхлэхээс өмнө Австрали руу явсан боловч Өмнөд Солонгосын багтай хийсэн тэдний эхний тоглолт уг ажиллагаа эхэлсний дараа буюу гуравдугаар сарын 2-нд болсон байна.

Төрийн дуулал нь эгшиглэх үеэр Ираны эмэгтэй хөлбөмбөгчид чимээгүй зогсож байсан бөгөөд тэдний энэ үйлдлийг Ираны эрх баригчдыг эсэргүүцсэн дохио гэж үзжээ.

Эх сурвалж: Kazinform