Эрүүл мэндийн сайд Ж.Чинбүрэн болон НҮБ-ын Хөгжлийн хөтөлбөрийн Суурин төлөөлөгч Матилда Димовска нар харилцан ойлголцлын санамж бичигт өнөөдөр гарыг үсэг зурлаа.
ЭМЯ-ны мэдээлснээр, энэхүү санамж бичгийг байгуулснаар НҮБ-ын Хөгжлийн хөтөлбөр /UNDP/ олон улсын байгууллагаар дамжуулан эрүүл мэндийн байгууллагын тусламж үйлчилгээнд түгээмэл хэрэглэдэг, зардал өндөр, нэн шаардлагатай, тасалдал үүсэх өндөр эрсдэлтэй эмийг чанартай, боломжийн үнээр нэг эх үүсвэрээс шууд худалдан авах боломж бүрдэж байна.
Эрүүл мэндийн сайд Ж.Чинбүрэн Монгол Улсын Засгийн газар, бодлогын яамнаас эмийн үнэ, чанарын асуудалд ихээхэн анхаарч ажиллаж байгаа, чанартай эмийг боломжийн үнээр худалдан авах тогтолцоо руу шилжих эхний том алхам хийж буйг онцлов. Мөн НҮБ-ын Хөгжлийн хөтөлбөр Монгол Улсын Засгийн газартай тогтвортой хөгжлийн зорилт, үндэсний хөгжлийн бусад тэргүүлэх зорилтыг хэрэгжүүлэхэд тууштай дэмжлэг үзүүлэн ажиллаж байгаад талархал илэрхийллээ.
“Төрөөс төлбөрийг нь хариуцах зарим өвчин эмгэг, түүний эмийн жагсаалт”-д байдаг тасалдал үүсэх эрсдэлд ороод байсан гемофилийн эсрэг эмийг уг санамж бичгийн хүрээнд худалдан авах юм. Гемофилийн эсрэг эмийг цус бүлэгнэлтийн эмгэгтэй өвчтөнд тогтмол тарьж, цус алдалтаас сэргийлэх, цус алдалтыг эмчлэхэд хэрэглэдэг.
Мөн уналт таталтын эсрэг эмийг нэг эх үүсвэрээс авах эмийн жагсаалтад багтаан нийлүүлэхээр болж байна.
