Болгарын Софи хотод сонирхогчдын боксын Европын хамгийн олон жилийн түүхтэй тэмцээний нэг “Странджа 2026” болж байна.

Тус тэмцээнд 31 орны 340 орчим тамирчин өрсөлдөж байгаа бол манай улсаас дасгалжуулагч Ж.Отгонбаяр, О.Батхүү, Ж.Еркин нарын удирдлагад эрэгтэй долоо, эмэгтэй таван тамирчин ур чадвараа сорьж байна. Тодруулбал, эрэгтэйчүүдийн 50 кг-д олон улсын хэмжээний мастер А.Баттулга, 55 кг-д Х.Билгүүнсайхан, 60 кг-д Б.Буяндалай, Г.Лундаа. 65 кг-д Т.Энхтөр, 70 кг-д О.Бямба-Эрдэнэ, 75 кг-д спортын мастер Г.Далай, эмэгтэйчүүдийн 48 кг-д спортын мастер Э.Номуундарь, 51 кг-д олон улсын хэмжээний мастер Б.Мөнгөнсаран, 54 кг-д М.Энхжаргал, 57 кг-д Т.Номин-Эрдэнэ, 60 кг-д М.Намуун нар өрсөлдөж байгаа юм.

77 дахь удаагаа удаагаа болж буй тэмцээний медалийн төлөөх тулаан өнөөдрөөс эхэлж байгаа бөгөөд өнөөдөр эмэгтэйчүүдийн 60 кг-д М.Намуун Узбекистан улсын тамирчинтай, эрэгтэйчүүдийн 70 кг-д О.Бямба-Эрдэнэ Германы тамирчинтай шөвгийн 16-гийн тулаанаа хийнэ. Ялсан тохиолдолд хүрлийн төлөө рингэнд гарах эрхтэй болох юм. Харин маргааш эрэгтэйчүүдийн 50 кг-д А.Баттулга 55 кг-д Х.Билгүүнсайхан, 60 кг-д Б.Буяндалай нар медалийн төлөөх тулаанаа хийх хуваарьтай байна.

“Странджа” олон улсын тэмцээнээс манай улс хамгийн сүүлд хоёр жилийн өмнө медаль хүртсэн. Олон улсын хэмжээний мастер Х.Энх-Амар ганцаараа хүрэл медаль хүртсэнээр Монголын багийн цор ганц медалийг эх орондоо авчирч байсан юм.

77 дахь удаагийн тэмцээний аваргууд гуравдугаар сарын 1-нд тодорно.