Италийн Падола хотод өвлийн триатлоны залуучууд, насанд хүрэгчдийн дэлхийн аварга шалгаруулах тэмцээн маргааш эхлэх гэж байна.

Гурван өдөр үргэлжлэх тус тэмцээнд манай улсаас олон улсын хэмжээний мастер Н.Алтаншагай, залуу мастер А.Хүслэн нар дасгалжуулагч Ц.Баярхүүгийн удирдлагад оролцохоор Италид очжээ. Дэлхийн цомын шагналт Н.Алтаншагайгийн хувьд элит ангилалд өрсөлдөх бөгөөд түүний ангилалд 16 тамирчин оролцохоор бүртгүүлсэн байна. Тэгвэл “Алдар” спорт хороо, “Мон Алтиус” дээд сургуулийн тамирчин А.Хүслэнгийн тухайд U23 насанд хурд хүч, авхаалж самбаагаа сорих ба түүний ангилалд есөн тамирчин оролцо аж. Итали улс өвлийн олимп, паралимпын завсраар энэхүү тэмцээнийг хүлээн авч буйгаар онцлогтой. Тамирчин нийт 20 км зам туулна. Ингэхдээ 2 км гүйлт+4 км уулын дугуй+4 км цана+2 км гүйлт+4 км уулын дугуй+4 км цанаар явснаар барианд орох ажээ.

Н.Алтаншагайгийн хувьд триатлоны дэлхийн цомын шагналт байрт шалгарч байсан бол А.Хүслэн дугуйт цанын дэлхийн аваргад түрүүлж, өвлийн триатлоны УАШТ-д хоёр жил дараалан мөнгөн медаль хүртсэн юм.