Германы Берлин хотод болсон олон улсын бүжгийн 33 дахь удаагийн тэмцээнээс Монголын бүжигчин Э.Амаржаргал хүрэл медаль хүртжээ.
Түүний хувьд дөрвөн жилийн өмнө энэхүү тэмцээнээс мөнгөн медаль авч байсан юм. Ингэснээр тэрбээр ЮНЕСКО-д бүртгэлтэй бүжгийн 10 том тэмцээнд Монголынхоо төрийн далбааг хоёр удаа мандууллаа. Тэрбээр хүрэл медалиас гадна бүжиг дэглээч, хөгжмийн зохиолч номинацын шагнал хүртсэн байна. Мөн урилгаар гала тоглолтод оролцож, дэлхийн шилдгүүдтэй хамт бүжиглэжээ.
Бүжгийн “Бага олимп” хэмээн нэрлэдэг энэхүү тэмцээнд 40 орны бүжигчид оролцсоноос 17 орон медаль хүртсэн байна. Багийн нийлбэр дүнгээр БНСУ зургаан алт, дөрвөн мөнгө, хоёр хүрэл медаль хүртсэн амжилтаар тэргүүллээ. Тэгвэл Украин, Бельги, Герман, Швейцар эхний тавд багтсан бол Монгол Улс нэг хүрэл медальтай 16 дугаарт жагсав.
