Монголын мөсөн сурын холбооноос 100 сая төгрөгийн шагналын сантай “Магнай” болон дээд лигийн тэмцээнийг энэ сарын 27, 28-нд зохион байгуулна.
Тэмцээнд 10 баг тойргийн журмаар өрсөлдөх бөгөөд шилдэг баг, харваачдыг тодруулах юм. Дээд лигийн тэмцээнийг зохион байгуулснаар харваачид бусад багт түрээсийн болон солилцооны гэрээгээр харваж, цалин урамшуулал авах, илүү өрсөлдөөнтэй, чанартай баг бүрдүүлэх боломж бүрдэх аж. Мөн тамирчдад ур чадвараа ахиулж, авьяас чадвараа үнэлүүлэх, шатлан дэвших шинэ боломж нээгдэхийг онцоллоо.
Монголд төдийгүй дэлхийд хосгүйд тооцогдох уламжлалт өв, соёл болох мөсөн сурын харваа нь Баян-Өлгий аймгийн Булган суманд үе дамжин уламжлан ирсэн түүхтэй. Энэхүү өв соёлыг хамгаалах, хөгжүүлэх, түгээн дэлгэрүүлэх зорилгоор Монголын мөсөн сурын холбоог 2008 онд байгуулжээ.
Тус холбоо 2019, 2023, 2024 онд монгол туургатны мөсөн сурын аварга шалгаруулах тэмцээн, 2025, 2026 онд Олон улсын мөсөн сурын аварга шалгаруулах тэмцээнийг тус тус зохион байгуулсан байна. Мөн 2013 оноос спортын цол, тэмдэг олгож эхэлснээс хойш өнөөдрийн байдлаар 300 гаруй аймаг, улсын цолтой харваач төрөн гарчээ.
