Олон улсын уулчдын холбооноос зохион байгуулдаг мөсөнд авиралтын дэлхийн цомын аварга шалгаруулах тэмцээн АНУ-ын Колорадо мужийн Лонгмонт хотод болж, Монголын тамирчид мөнгө, хүрэл медаль хүртлээ.
2025-2026 оны улирлын гурав дахь цувралд манай улсаас олон улсын хэмжээний мастер Ч.Мандахбаяр, Н.Хэрлэн, О.Сайханжаргал, Н.Сэлэнгэ нар оролцсон юм. Энэхүү тэмцээний эрэгтэйчүүдийн хурдны төрөлд “Сутайн бор” клубийн тамирчин, олон улсын хэмжээний мастер Ч.Мандахбаяр мөнгө, Н.Хэрлэн хүрэл медаль хүртсэн бол спортын мастер О.Сайханжаргал XIII байрт шалгарчээ. Харин эмэгтэйчүүдийн хурдны төрөлд олон улсын хэмжээний мастер Н.Сэлэнгэ IV байрт жагслаа. Эрэгтэйчүүдийн хурдны төрөлд эхний гурван байрт орсон тамирчдыг ердөө 0.07 секунд зааглажээ. Ч.Мандахбаяр хурдны төрлийн урьдчилсан шатанд 14 метрийн өндөртэй ханыг 5.47 секунд туулж Лонгмонтын тэмцээний дээд амжилтыг шинэчлэн тогтоосон байна.
Мөн Ч.Сэлэнгэ, Н.Сэлэнгэ нар техникийн төрөлд өрсөлдсөн байна. Тэд өмнө нь зөвхөн хурдны төрөлд хурд, хүч, авхаалж самбаагаа сорьдог байсан бол энэ улирлаас техникт тогтмол оролцохоор төлөвлөжээ. Манай тамирчид 2025-2026 оны улирлын эхний гурван тэмцээнээс нэг алт, хоёр мөнгө, нэг хүрэл медаль хүртсэн. Одоо Канадад болох дэлхийн цомын сүүлчийн цуврал тэмцээн манай тамирчдыг хүлээж байгаа юм.
