Хүн төрөлхтний эв найрамдалын бэлгэ тэмдэг өвлийн XXV олимп 16 хоногийн турш үргэлжилж, албан ёсоор хөшгөө хаалаа.

Энэ удаагийн олимпод 92 орны тамирчид өрсөлдсөнөөс Норвегийн баг 18 алт, 12 мөнгө, 11 хүрэл медальтайгаар тэргүүлэв. Тэгвэл АНУ-ын баг 12 алт, 12 мөнгө, есөн хүрэл медальтайгаар удаалсан бол Нидерланд, Итали, Германы баг айрагджээ. Харин Азийн төлөөллөөс Япон топ 10-т багтсан бол Хятад 12, Солонгос, 13, Казахстан 19 дүгээр байрт шалгарсан байна. Олимпын наадамд нийт 92 орон оролцсоноос 29 нь ямар нэгэн байдлаар медальтай нутаг буцлаа. Үүнээс 20 нь олимпын аваргатай болжээ.

Манай улсаас гүйлтийн цана болон уулын цанын төрөлд гурван тамирчнаа сойсон бөгөөд хамгийн өндөр амжилтыг А.Ариунбат үзүүлэв. Тэрбээр анхны олимпын наадамдаа оролцохдоо 38 дугаар байрт шалгарсан юм. Тэгвэл олон улсын хэмжээний мастер Б.Ачбадрах гурав дахь олимпдоо гурван зайд уралдсан бол Э.Ариунтунгалаг анхны наадамдаа хоёр зайд хурд, хүчээ сорилоо. Мөн олимпын наадмыг зургаан телевизийн найман сувгаар эх орон даяар шууд дамжуулахаас гадна Монголын таван сэтгүүлч, зураглаач, гэрэл зурагчин олимпын талбарт ажиллажээ.

Түүнчлэн хаалтын өдөр олимпын аварга болсон АНУ-ын хоккейн шигшээ багийн медалийг Олон улсын олимпын хорооны гишүүн, МҮОХ-ны ерөнхийлөгч Б.Баттүшиг гардуулсан нь онцлох үйл явдлын нэг болж, түүхийн хуудсанд үлдэв. АНУ-ын хоккейчид 46 жилийн дараа олимпоос гурав дахь алтан медалиа гардсан баярт мөчийг монголчууд хуваалцлаа.

Монголчууд анх 1964 оны Инсбрукийн өвлийн олимпод оролцсоноос хойш 16 дахь наадамдаа тасралтгүй тамирчнаа илгээсэн нь энэ юм.