Киргизстаны нийслэл Бишкек хотод чөлөөт бөх, сонгомол барилдааны дэлхийн оддын тэмцээн болж, 65 кг-ын жинд урилгаар оролцсон гавьяат тамирчин Т.Тулга түрүүллээ.
Олимпын 57, 65, 74, 86, 97 кг гэсэн таван жинд тус бүр шилдэг дөрвөн тамирчин энэхүү тэмцээнд өрсөлдсөн бөгөөд гавьяат тамирчин Т.Тулга бүх өрсөлдөгчөө буулган авснаар ялагчийн бүс зүүжээ. Түүний жинд ДАШТ-ий алт, мөнгө, Европын хошой аварга, Дэлхийн цомын аварга, ОХУ-ын бөх Абасгажи Магомедов, U23 ДАШТ-ий мөнгөн медальт, Азербайжаны тамирчин Руслан Абдулаев Яшар Догугийн тэмцээний аварга, U23 ДАШТ-ий хос хүрэл медальтай, U23 Азийн АШТ-ий хошой аварга, Киргизийн бөх Билол Шарип Уулу нар байсан юм.
Тус тэмцээн нь дэлхийн дэвжээнд амжилтаараа танигдсан шилдгүүдийг нэг дор цуглуулж, чансаа, ур чадвар, сэтгэлзүйн бэлтгэлийг бодитоор сорьдог онцлогтой.
