Билгийн тооллын XVII жарны сар шинийн баярт зориулсан улс, аймаг, цэрэг, сумын цолтой 256 бөхийн барилдаан өнөөдөр Монгол бөхийн өргөөнд эхэлнэ.

Билгийн тооллын шинэ он болох цагаан сарыг тохиолдуулан битүүний өдөр зохион байгуулдаг уг барилдааныг анх 1963 онд анх Нэгдэлчдийн баярын барилдаан хэмээх нэртэй эхлүүлсэн түүхтэй. Тэр цагаас хойш 2020, 2021 онд цар тахлын улмаас зохион байгуулаагүйг эс тооцвол 61 дэх жилдээ болж байна. Энэ жилийн барилдаанд дархан аварга А.Сүхбат, Н.Батсуурь, улсын аварга П.Бүрэнтөгс, О.Хангай гэсэн дөрвөн аварга, зургаан арслан, нэг гарди, 10 заан, 16 харцага, 28 начин, нийт улсын цолтой 66 бөх зодоглохоор бүртгүүлжээ. Сар шинийн баярт зориулсан барилдаанд 27 жилийн дараа дархан аварга цолтой хоёр бөх зүүн, барууныг магнайлан зодоглохоор бүртгүүлснээрээ онцлогтой.

Тодруулбал, хамгийн сүүлд 1999 оны “Согтох төгөлдөр” хэмээх шороон туулай жилийн сар шинийн баярт зориулсан барилдаанд дархан аварга Х.Баянмөнх, Б.Бат-Эрдэнэ нар зодоглож байсан түүхтэй юм. Тэр цагаас хойш өнөөг хүртэл дархан аваргууд зүүн, баруун жигүүрийг манлайлаагүй байлаа. Тэгвэл өнөөдөр дархан аварга А.Сүхбат, Н.Батсуурь нар 256 бөхийн тэргүүлэн барилдах нь ээ. Өнөөдөр сар шинийн баярт зориулсан барилдааны нэг болон хоёрын даваа болно. Харин маргааш 13:00 цагт гурвын даваанаас эхлэн барилдаан үргэлжилнэ.

Ташрамд дурдахад, сүүлийн хоёр жилийн сар шинийн барилдаанд улсын аварга О.Хангай дараалан түрүүлсэн юм. Сүүлийн 10 жилд улсын аварга Ч.Санжаадамба, О.Хангай, заан Б.Бат-Өлзий нар тус бүр хоёр, арслан Р.Пүрэвдагва, Ц.Содномдорж, гарди Д.Рагчаа, начин Э.Мөнхжаргал нар тус бүр нэг түрүүлээд байна. Өөрөөр хэлбэл, Архангай тав, Ховд дөрөв, Хөсвгөл аймгаас нэг түрүүлээд байгаа юм.