Лондоны их сургуулийн коллежийн (UCL) эрдэмтэд илүүдэл жинтэй хүмүүсийн 70 гаруй хувь нь халдварт өвчний улмаас эмнэлэгт хэвтэх эсвэл нас барах өндөр эрсдэлтэй байгааг тогтоосон талаар Medical Xpress сэтгүүл мэдээллээ.

Өөхлөлт ба халдварт өвчний аюултай хамаарал

Олон жилийн турш өөхлөлтийг бодисын солилцооны хам шинж, чихрийн шижин, зүрх судасны өвчин зэрэг архаг хууч өвчний үндсэн шалтгаан гэж үзсээр ирсэн. Тэгвэл шинэ судалгаагаар өөхлөлт нь халдварт өвчний явцад шийдвэрлэх нөлөө үзүүлж, өвчнийг хүндрүүлэх төдийгүй үхэлд хүргэх гол хүчин зүйл болдгийг батлан харууллаа.

Судалгааны багийн ахлагч, UCL-ийн Нейробиологийн факультетын профессор Мика Кивимаки "Өөхлөлттэй хүмүүст элдэв халдварт өвчин маш хүнд тусдаг, эмчилгээний үр дүн муу байдгийг бид судалгаагаар баталгаажуулж чадлаа" хэмээн онцолжээ.

540 мянган хүнийг 14 жилийн турш ажиглажээ

Эрдэмтэд энэхүү томоохон хэмжээний когорт судалгаандаа 540 мянган хүний мэдээллийг хамруулсан байна. Судалгаанд оролцогчид өөхлөлтийн зэргийг тодорхойлох олон төрлийн шинжилгээнд хамрагдсан бөгөөд тэдний эрүүл мэндийн байдлыг дунджаар 13-14 жилийн турш тасралтгүй ажиглажээ.

Судалгааны гол үзүүлэлтүүд:

• БЖИ 30-аас дээш: Биеийн жингийн индекс (БЖИ) нь 30 ба түүнээс дээш буюу таргалалттай хүмүүс халдвар авах магадлал өндөр байна. Тэднийг хэвийн жинтэй (БЖИ 18.5 – 24.9) хүмүүстэй харьцуулахад халдварын улмаас эмнэлэгт хэвтэх эсвэл нас барах эрсдэл нь 70%-иар илүү байв.

• БЖИ 40-өөс дээш: Хэт таргалалттай хүмүүсийн хувьд өвчний явц хэвийн жинтэй хүмүүсээс 3 дахин илүү хүнд байжээ.

• Хэмжих үзүүлэлт: Өөхлөлт ба халдварт өвчний хоорондын хамаарал нь зөвхөн БЖИ-ээр бус, бүсэлхийн тойргийн хэмжээ, бүсэлхий болон өндрийн харьцаа зэрэг бүх төрлийн хэмжилтээр ижилхэн өндөр гарч байв.

Ямар өвчнүүдэд илүү аюултай вэ?

Судалгаанд нянгийн, вирусний, шимэгч хорхойн болон мөөгөнцрийн гаралтай нийт 925 төрлийн өвчнийг хамруулжээ. Үүнээс дараах өвчнүүдийн үед тарган хүмүүс хамгийн их эрсдэлд орж байв:

• Томуу болон томуу төст өвчин

• COVID-19

• Уушгины хатгалгаа

• Хоол боловсруулах замын халдвар (гастроэнтерит)

• Шээсний замын халдвар

Сонирхолтой нь, өөхлөлт нь ВИЧ (ДОХ) болон сүрьеэ өвчний хүндрэлд төдийлөн нөлөөлдөггүй болох нь ажиглагдсан байна.

Жингээ хасах нь аврал болно

Профессор Кивимакигийн хэлснээр, өөхлөлт нь хүний дархлааны тогтолцоог сулруулж, халдварын эсрэг тэмцэх чадварыг нь үгүй хийдэг байна. "Халдвар авах нь амархан боловч эргээд илаарших явц нь маш хүнд, эрсдэлтэй байдаг" гэж тэрээр тайлбарлав.

Гэхдээ судалгаанд нэгэн өөдрөг үзүүлэлт гарсан нь жин хасах явдал юм. Жингээ хассан хүмүүс илүүдэл жинтэй хэвээр байгаа хүмүүстэй харьцуулахад халдварт өвчний хүндрэх эрсдэлээ 20%-иар бууруулж чаджээ.

Хельсингийн их сургуулийн доктор Солья Нюберг "Ойрын жилүүдэд дэлхий даяар таргалалт улам нэмэгдэх хандлагатай байна. Энэ нь халдварт өвчний улмаас нас барах тохиолдол болон эмнэлгийн ачааллыг үлэмж хэмжээгээр нэмэгдүүлнэ" гэж анхаарууллаа.

Өмнө нь "Medical Xpress" сэтгүүл хүүхдийн өөхлөлт нь ирээдүйд зүрх судасны өвчнөөр өвчлөх суурь болдог талаар мэдээлж байсан бол ийнхүү халдварт өвчний гол "дайсан" болж байгааг дахин сануулж байна.

Эх сурвалж: Medical Xpress, Izvestia