“Милан-Кортина”-2026 өвлийн XXV олимпын наадмын гүйлтийн цанын эмэгтэйчүүдийн 10 км-ийн чөлөөт тэшилтийн төрөлд өрсөлдсөн олон улсын хэмжээний мастер Э.Ариунтунгалаг 83 дугаар байрт барианд орлоо.

Тодруулбал, Тесеро дахь цанын баазад болсон цуваа гараатай уралдаанд гараанаас 111 цаначин гарснаас 108 нь барианд оржээ. Бразил, Босни Герцеговна улсын тамирчид барианд орж чадалгүй замаасаа гарсан бол Исландын цаначин торгуулиар хасагдсан байна. Харин олон улсын хэмжээний мастер Э.Ариунтунгалаг энэ удаа 28:38.2 минутын амжилтаар барианд орж, 83 дугаар байрт бичигдсэн юм. Түүний хувьд Тайланд, Унгар, Грек, Болгар, Хорват, Словени, Аргентин, Литва, Латви, Румын, Иран, Бразил, Словак, Турк, Македон, Молдав, Серб, Мальт, Мексик, Босни, Исланд зэрэг 21 орны 28 тамирчныг ардаа үлдээсэн байна. Манай тамирчин анхны олимпдоо хоёр зайд уралдахдаа 68, 83 дугаар байр эзэлснээр “Милан-Кортина 2026” наадмыг хаалаа.

Өчигдөр болсон цуваа гараатай 10 км-ийн чөлөөт тэшилтийн уралдаанд Шведийн Фрида Карлссон 22:49.2 амжилтаар түрүүлж, энэ олимпоос хоёр дахь алтан медалиа зүүлээ. Тэрбээр энэ сарын 7-нд 20 км-ийн скиатлонд түрүүлсэн юм. Тэгвэл Шведийн Эбба Андерссон 6 хоногийн өмнө скиатлоноос авсан мөнгөн медалиа ихэрлүүлэв. Харин хүрэл медалийг Пёнчаны олимпын аварга, Бээжингийн олимпын мөнгө, хүрэл медальт, АНУ-ын тамирчин Жесси Диггинс энгэртээ зүүлээ.

10 км-ийн чөлөөт гүйлтийн төрөл нь завсарлагатай гарааны (interval start) системээр явагддаг. Иймд барианд хамгийн түрүүнд орсон тамирчин бус богино хугацаанд зайгаа туулсан тамирчин ялагчаар тодордог онцлогтой.

Гүйлтийн цанын эрэгтэйчүүдийн 10 км-ийн чөлөөт тэшилтийн төрөлд олон улсын хэмжээний мастер Б.Ачбадрах өнөөдөр уралдана.

Гэрэл зургийг: Монголын спортын сэтгүүлчдийн холбооны гишүүн Д.Нямбилэг