Олон улсын эпилепсийн өдрийг энэ жил “Жил бүр алхам алхмаар хамтдаа өөрчилье” уриан дор олон нийтэд мэдээлэл өгөх, ойлголт, хандлагыг сайжруулах зорилгоор тэмдэглэж байна.

Эпилепси нь хүний тархины эсүүдэд гэнэтийн хүчтэй эмгэг цахилгаан идэвхжил үүссэний улмаас ухаан алдах, уналт таталтын үечилсэн хөдлөлөөр илрэх эмгэг юм. Аль ч насны, ямар ч хүнд тохиолдож болох эпилепси өвчний 40-50 хувьд тодорхой шалтгаан тогтоогдоогүй бөгөөд үлдсэн хувьд нь генетикийн бүтэц, бодисын солилцоо, дархлаа, халдварын шалтгааны улмаас үүсдэг байна. Эпилепси нь хүүхэд насанд эхэлж, тодорхой нас өнгөрөхөд арилах нь ч бий. Нэг эмд үр дүнгээ өгч унаж татахгүй болох тохиолдол байдаг ч заримдаа олон эмд тэсвэртэй хүнд хэлбэрийн гээд янз бүрийн үр дүн, шинж тэмдэгтэй байдаг ажээ.

Эпилепсийн өдрөөр энэ жил Хөгжлийн бэрхшээлтэй хүүхдийн сэргээн засах хөгжлийн төв тархины цахилгаан бичлэгийн кабинетыг нээжээ. Ингэснээр унаж татдаг хүүхдэд эпилепсийн оношилгоо, эмчилгээ, эрүүл мэндийн тусламж үйлчилгээг үзүүлэхэд ахиц гарч байгаа юм. Тус төвд эпилепсийн мэргэшсэн эмчийн үзлэг, тархины цахилгаан бичлэг, лабораторийн шинжилгээ, мэдрэл сэтгэцийн үнэлгээ, төрөлжсөн нарийн мэргэшлийн эмч нарын үзлэг, тусламж үйлчилгээг үзүүлж байна.

Монгол Улсад эпилепси оноштой насанд хүрсэн 1933 иргэн, 18 хүртэлх насны 1140 хүүхэд байгаа судалгаа бий. Дэлхий даяар эпилепситэй 60 сая гаруй хүн амьдардаг ажээ.