Монгол Улсын Гавьяат тамирчин, уулын спортын олон улсын хэмжээний мастер Б.Цэвээндаш Улаанбаатар-Бээжин-Тяньжин хүртэл 1600 километрийн гүйлтээ өнөөдөр эхлүүллээ.

Тэрбээр хүүхэд залуучуудын сэтгэл хямрал, дэлгэцийн хамаарал маш том асуудал болоод байгаа учир эрүүл зөв амьдралын хэв маягийг ярих биш өөрөө биеэрээ үлгэрлэн харуулахыг зорьж байгаагаа онцлоод “Хүмүүс ганц автобусны буудал явган алхахаасаа ч төвөгшөөдөг болсон. Өвөл гүйхээс айх хэрэггүй. Биеийн тамир, спортыг сонгосон хүний тэсвэр тэвчээр бол маш агуу байдаг. Спортоор хичээллэсэн хүн олон давуу талыг олно. Залуус маш их хөдөлгөөний дутагдалд орж, цахим хэрэглээнээс бол сэтгэцийн өөрчлөлттэй болж байна. Энэ ганц манай улсад тохиож байгаа асуудал биш. Дэлхий нийтийнх. Хүмүүс хүйтнээс их айдаг. Гэтэл өвлийн цагт ч бид гүйж болдгийг харуулах учиртай. Өнөөдөр би дахин нэг сорилттой тулгарч шинэ гүйлтийг эхлүүлэх гэж байна. Нийгмийн сөрөг хандлага их болсон энэ үед өвлийн гүйлтээрээ дамжуулж бусдад сайн сайхан зүйлийг өгөхийг хүслээ. Би бэлтгэлээ сайн хийсэн. Хятадын нутгаар явах учир маш сайн төлөвлөгөө гаргасан. Анх замдаа майханд хоноглоод явахыг төлөвлөж байсан ч машинтай явахаар боллоо. Надтай хамт хоёр хүн хамт явна. Гүйлтийн үеэр аюулгүй байдлаа сайн хангана” гэлээ.

Түүний гүйлт Улаанбаатар хотоос эхлэх бөгөөд Замын-Үүд, Эрээн, Хөх хот, Жанчхүүгийн даваа, Цагаан хэрэм зэргээр дамжин өдөр бүтэн марафон буюу 42 км гүйж 1600 км-ийг 40-45 хоногт туулахаар төлөвлөжээ.