"Цанахүү-2026" өсвөрийн улсын аварга шалгаруулах тэмцээн Баруунтуруун суманд хоёр дахь өдрөө үргэлжилж байна.

Тэмцээнд 14 багийн 130 гаруй тамирчин хурд хүч, авхаалж самбаагаа сорин өрсөлдөж байгаа бөгөөд хамгийн холоос Дорнод аймгийн тамирчид иржээ. Тэмцээний эхний өдөр 17-18 насны хөвгүүдийн 15 км зайн сонгомол төрөлд тэргүүн байрыг Төв аймгийн тамирчин С.Мөнхжаргал эзэлсэн бол Хөвсгөл аймгийн П.Золжаргал, Увс аймгийн Б.Эрдэнэ нар удааллаа. Мөн 17-18 насны охидын 10 км зайн сонгомол төрөлд Орхон аймгийн О.Анужин, Увс аймгийн Б.Нандин-Эрдэнэ, Өвөрхангай аймгийн О.Отгонцэцэг нар эхний гурван байрт шалгарсан юм.

Харин 10 хүртэлх насны хөвгүүдийн 2 км зайн сонгомол төрөлд Увс аймгийн Б.Чингүүн, 10 хүртлэх охидын 1,5 км зайн сонгомол төрөлд Өвөрхангай аймгийн П.Цэнджаргал, 11-12 насны хөвгүүдийн 3 км зайн сонгомол төрөлд Булган аймгийн Т.Хос-Од,  11-12 насны охидын 2 км зайн сонгомол төрөлд Дархан-Уул аймгийн Э.Энхрийлэн нар тус тус аваргаллаа.

Түүнчлэн 13-14 насны хөвгүүдийн 5 км зайн сонгомол төрөлд Увс аймгийн Г.Мөнх-Очир, 13-14 насны охидын 3 км зайн сонгомол төрөлд Төв аймгийн А.Анхилуун,  15-16 насны хөвгүүдийн 10 км зайн сонгомол төрөлд Увс аймгийн Э.Мөрөн, 15-16 насны охидын 5 км зайн сонгомол төрөлд Төв аймгийн Б.Халиунаа нар тус тус тэргүүлээд байна.

Өсвөрийн цанын улсын аварга шалгаруулах тэмцээнийг Баруунтуруун суманд 24 жилийн дараа зохион байгуулж байгаа байна.

Тамирчин хүний тэсвэр тэвчээрийг шалгадаг цанын спортоор Увс аймгийн тамирчид 1960-аад оноос хойш тогтмол хичээллэж, томоохон амжилтуудыг гаргасаар ирсэн түүхтэй. Сүүлийн жилүүдэд Увс аймгийн Баруунтуруун, Зүүнговь, Малчин, Хяргас, Цагаанхайрхан сумдын өсвөрийн тамирчид цанын спортоор тууштай хичээллэж байна.

Өсвөрийн цанын улсын аварга шалгаруулах тэмцээн өмнө нь Увс аймгийн Зүүнговь, Малчин суманд болж байсан. Увс аймгийн эдгээр суманд цанын тэмцээнийг зохион явуулахад цаг агаар, орчин нөхцөл нь бүрдсэн байдаг.