Азийн сагсан бөмбөгийн холбооноос зохион байгуулдаг Зүүн Азийн супер лигийн 2025-2026 оны улиралд Монголоос “Хасын Хүлэгүүд” баг оролцож байгаа билээ.
Монголын лигийн есөн удаагийн аваргаар шалгарсан тус баг хэсгийн сүүлийн тоглолтоо энэ сарын 11-нд Улаанбаатар хотын “Мбанк арена”-д хийх гэж байна. Тэд талбайдаа Японы алдарт “Тоёота” корпорацын ивээн тэтгэдэг “Алварк Токио” багийг хүлээн авах юм. Хоёр баг улирлын анхны тоглолтоо Японы Токио хотод хийхэд “Хасын Хүлэгүүд” өрсөлдөгчөө талбай дээр нь 84:69-өөр буулган авч байлаа. Тэгвэл хэсгийн сүүлчийн тоглолтод дахин учраа таарч байна. Тус багийнханд талбайдаа хожигдвол тэмцээнээ өндөрлүүлнэ. Харин хожвол хасагдах шатанд шалгарч, Зүүн Азийн супер лигийн аяллаа үргэлжлүүлэх юм. “Хасын Хүлэгүүд” баг энэхүү чухал тоглолтод оролцохын тулд монголчуудад танил болсон Тайландын шигшээ багийн тоглогч Фредрих Лишийг багтаа элсүүлж, нэмэлт хүч болгон ашиглах нь ээ. Лиш өнөөдөр Монголд ирж байгаа бөгөөд маргаашаас багтайгаа нэгдсэн бэлтгэлд гарах ажээ.
“Хасын Хүлэгүүд”-ийн тоглож буй “С” хэсгийг “Алварк Токио” гурван хожилтойгоор тэргүүлж байна. Тэд нээлтийн тоглолтод “Хасын Хүлэгүүд”-д хожигдсоноос хойш гурав дараалан хожжээ. Тус баг маргааш “Нью Тайпэй Кингс”-тэй дахь тоглолтоо хийнэ. Хоёр багийн хожсон нь хэсгээсээ шалгарах болзлоо хангах юм. Тэгвэл “Хасын Хүлэгүүд” таван тоглолтынхоо сүүлийн хоёрт нь дараалан хожигдсоноор хүснэгтийн гуравдугаарт жагсаж байна. Хэсгийн сүүлчийн тоглолтдоо хожвол хэсгээсээ шалгарах юм.
Тус лигийн “А” хэсгээс Солонгосын “Сөүл Найтс, “В” хэсгээс Тайванийн “Таоюан Пайлотс” баг хасагдах шатанд өрсөлдөх болзлоо албан ёсоор хангаад байна.
