Хүн төрөлхтний эв найрамдлын бэлгэ тэмдэг болсон өвлийн XXV олимп хөшгөө нээхэд гурав хоногийн хугацаа үлдлээ.

Италийн Милан хотын “Сан-Сиро” цэнгэлдэх хүрээлэнд энэ сарын 6-нд албан ёсоор нээлтээ хийж, 16 хоногийн дараа Кортина-д’Ампеццо хотод хөшгөө энэхүү олимп нь түүхэндээ хоёр хотод зэрэг зохион байгуулах анхны наадам гэдгээрээ онцлогтой. Өвлийн XXV олимптой холбоотой мэдээллийг цувралаар хүргэе.

Лого

Түүхэнд анх удаа олимпын наадмын логог цахимаар нээлттэй санал асуулгаар тодруулсан. Улмаар Футура (Futura) төсөл ялсан бөгөөд уг лого нь цасан дээр тасралтгүй шугамаар “26” гэж бичсэн дүрстэй.

Бамбар

Эссенциал (Essential) нэртэй олимпын бамбар нь тун минималист бөгөөд цэвэр ариун, инновацыг бэлгэджээ. Дахин сэргээгдэх эрчим хүчээр цэнэглэдэг, эко бамбар юм.

Уриа

Энэхүү наадам “Энэ бол таны уур амьсгал” (IT's Your Vibe) гэсэн уриатай.

Маскот

Мило, Тина нэртэй булга энэ удаагийн наадмыг маскот юм. Тэдний нэрс нь зохион байгуулагч хоёр хотын нэрийг богиносгосон хэлбэр аж. Кортинагийн хувьд Тина, Миланы хувьд Мило. Цагаан арьстай Тина урлаг, хөгжим, олимпын наадмын гоо үзэсгэлэнг илтгэнэ. Харин хүрэн арьстай Мило хөлгүй төрсөн ч сүүлээ ашиглан, цог золбоотой амьдарч байгаа нь паралимпын наадмыг төлөөлжээ. Энэ хоёр булгыг Таверна хотын хүүхдүүдийн зургаас сонгосон гэнэ.

Олимпын гал

Олимпын галыг 2025 оны арваннэгдүгээр сарын 26-нд Грекийн Олимп ууланд асааж, бамбарын буухиа эхэлсэн. Буухиа 2025 оны арванхоёрдугаар сарын 6-нд Ром хотод ирж, Италийн 110 муж, 60 хотоор аялан, эцэст нь Миланд бадамлана.

Олимпын медаль

Олимпын медаль нь тамирчны ялалт, ялалтын ард байдаг баг хамт олныг илэрхийлжээ. Өвлийн олимпын наадамд 245 алт, 245 мөнгө, 245 хүрэл медалийн эзэн тодорно. Медалийн голд олимп, паралимпын бэлгэ тэмдэг болон “Милан-Кортина 2026”-ийн логотой. Диаметр нь 80 мм, зузаан нь 10 мм. Медалийг Европын хэвлэл болон зоос үйлдвэрлэлээр тэргүүлэгч “Istituto Poligrafico e Zecca dello Stato” компани урлажээ. Ингэхдээ сэргээгдэх эрчим хүч ашиглаж, байгальд ээлтэй, хоргүй, дахин боловсруулах боломжтой хамгаалалтын бүрхүүлтэй хийсэн байна.

Төсөв

Өвлийн XXV наадмын нийт төсөв 1.7 тэрбум евро.

Спортын байгууламжууд

Миланы алдарт “Сан Сиро” цэнгэлдэх хүрээлэнд нээлт болох бөгөөд уг цогцолбор нь 77 мянган хүний багтаамжтай. Тэгвэл шайбтай хоккейн тэмцээн 14 мянган хүний суудалтай “Милано Санта Жулиа”, 12 мянган хүний багтаамжтай “Милано Ро” цэнгэлдэхэд болно. Уран гулгалт, тэшүүрийн тэмцээн нь “Милано” цэнгэлдэх болон талбайд болно. Шагнал гардуулах ёслолыг “Пиазза дель Дуомо”-д зохион байгуулах ажээ.

Харин биатлон, кёрлинг, уулын болон гүйлтийн цана, бобслей, чарга, сноуборд, фрийстайлын тэмцээн Кортина д'Ампеццо хотын найман цэнгэлдэх хүрээлэн, спорт цогцолборт болно.

Спортын төрлүүд

Олон улсын олимпын хорооноос Скимо буюу Ski mountaineering төрлийг анх удаа олимпын наадмын хөтөлбөрт багтаасан. Италийн олимпын наадмаар нийт 116 багц медалийн төлөө өрсөлдөх нь 2022 оны наадмаас долоогоор илүү байна. Өнгөрсөн олимптой харьцуулахад найман багц медалийг нэмжээ. Биатлон, бобслей, скелетон, кёрлинг, гүйлтийн тэшүүр, уран гулгалт, шорт-трек, уулын цана, цанын 2 төрөлт, гүйлтийн цана, трамплин харайлт, фрийстайл, сноуборд, чарга, цана-альпинизм, хоккей.

Тамирчид

Олимпын наадамд 92 улсын 2900 тамирчин оролцоно. Бенин, Гвинея-Бисау, АНЭУ гэсэн гурван орон өвлийн олимпод анх удаа өрсөлдөх аж. Дайны улмаас ОХУ, Беларусийн баг туг далбаа, сүлд дуулалгүй оролцох болно.

Монгол Улсаас “Милан Кортина 2026” Өвлийн Олимпын наадамд гүйлтийн цанын төрөлд Б.Ачбадрах, Э.Ариунтунгалаг, уулын цанын төрөлд А.Ариунбат нар өрсөлдөхөөр Кортина д'Ампеццо хотод бэлтгэлээ базааж байна.