Монголын үндэсний олимпын хорооны 70 жил, “Хилчин” спорт хорооны 80, Монгол хүн цанаар аялсны түүхт 85 жилийн ойн хүрээнд “Милан-Кортина 2026” өвлийн олимпын наадмыг угтсан гүйлтийн цанын өртөөчилсөн аялал эхэллээ.

Сэлэнгэ аймгийн Алтанбулаг боомтоос эхэлж буй аялалд оролцож буй цаначид 360 гаруй км замыг зургаан өдөрт туулах бөгөөд энэ сарын 6-нд Улаанбаатар хотын “Сүлдэт багана” цогцолборт барианд орно. Ингэхдээ Алтанбулаг-Сүхбаатар-Орхон зөрлөг-Дархан-Баруунхараа-Борнуур-Баянчандмань-61-ийн гарам-“Сүлдэт багана” цогцолбор гэсэн маршрутаар өдөрт 23-51 км замыг туулах аж. Аялалд цанын залуу тамирчин Н.Батбаяраас эхлээд ХХЕГ-ын дарга, Хилийн цэргийн командлагчаар ажиллаж байсан хошууч генерал Ш.Лхачинжав тэргүүртэй 19-82 хүртэлх настай гурван үеийн төлөөлөл болсон 12 тамирчин оролцож буйгаараа онцлогтой.

Энэхүү гүйлтийн цанын аяллыг Монгол Улсын Ерөнхийлөгчийн 27 дугаар зарлигийн хэрэгжилтийг хангах, өвлийн спортыг олон нийтэд түгээн дэлгэрүүлэх, хөгжүүлэх зорилгоор Хил хамгаалах байгууллага, Биеийн тамир, спортын улсын хороо, Монголын үндэсний олимпын хороо, Монгол-Оросын хувь нийлүүлсэн “Улаанбаатар төмөр зам” нийгэмлэг, “Зэв” залуусын холбоо, Монголын цанын холбоо, “Сандагаа багш цана, дугуйн холбоо” төрийн бус байгууллага хамтран зохион байгуулж байна.