Лихтенштейний Мальбун хотод мөсөнд авиралтын залуучуудын дэлхийн аварга шалгаруулах тэмцээн гурван насны ангиллаар болж, манай улсын гурван медаль хүртэв.
20 гаруй орны 150 орчим тамирчин оролцсон энэхүү тэмцээнд Монголоос дасгалжуулагч Д.Отгонхүүгээр удирдуулсан найман тамирчин өрсөлдөхдөө нэг алт, хоёр хүрэл медалиар энгэрээ мялаасан байна. Түүнчлэн найман тамирчин бүгд финалд шалгарсан бахдам амжилт үзүүлжээ.
U20 насны эмэгтэйчүүдийн ангилалд Ж.Амина түрүүлж, төрийн дууллаа эгшиглүүллээ. Тэрбээр өнгөрсөн жил АНУ-ын Өүрэй хотод залуучуудын ДАШТ-ий U18 насанд алтан медаль хүртэж байсан юм. Ингэснээр хоёр жил дараалан түрүүлж, дэлхийн хошой аварга боллоо. Үүнээс гадна U16 насанд Б.Энхрий-Эрдэнэ өнгөрсөн жил авсан хүрэл медалиар ихэрлүүллээ. Мөн эмэгтэйчүүдийн U18 насанд П.Мөнхбаяр анхны медалиа зүүсэн байна.
