ОХУ-ын Красноярск хотод болсон Оросын алдарт бөх Иван Ярыгины нэрэмжит олон улсын тэмцээнээс Монголын бөхчүүд хоёр алт, нэг мөнгө, долоон хүрэл медальтай эх орондоо ирж байна.
37 дахь удаагийн тэмцээний эхний өдөр Б.Мөнх-Эрдэнэ алтан медаль хүртэж, Монголын эрэгтэй тамирчдын 27 жил тасарсан амжилтыг буухиалаад зогсохгүй энэ удаагийн тэмцээнд түрүүлэхээс гадна “Шилдэг тамирчин”-аар тодорсон юм. Түүнчлэн Т.Энхжин, Х.Болортуяа нар хүрэл медалийн тавцанд зогссон юм.
Тэгвэл тэмцээний сүүлийн өдөр эмэгтэйчүүдийн 76 кг-ын жинд зодоглосон “Хилчин” спорт хороо, Говь-Алтай аймгийн “Хантайшир” дэвжээний бөх Т.Түвшинжаргал гайхалтай барилдаан үзүүлэн аваргын алтан медаль хүртэж, Монгол Улсын төрийн дууллыг Красноярскт эгшиглүүлэв. Ингэснээр 37 дахь удаагийн тэмцээнд манай төрийн дуулал хоёр удаа эгшиглэсэн юм. Түүнчлэн эмэгтэйчүүдийн 76 кг-д Г.Уртанасан, 72 кг-д З.Болортунгалаг, 68 кг-д Э.Одгэрэл, 57 кг-д үндэсний шигшээ багийн тамирчин Б.Хулан, 53 кг-д Б.Отгонтуяа нар хүрэл медаль хүртлээ.
