Дэлхийн чансааг тэргүүлж буй Беларусийн теннисчин Арина Соболенко Мельбурн хотноо болж буй Австралийн аварга шалгаруулах нээлттэй тэмцээний финалд шалгарлаа.

Хагас шигшээ тоглолтод тэрбээр Украины теннисчин Элина Свитолинаг 6:2, 6:3 харьцаагаар хожжээ. Тоглолт 1 цаг 16 минут үргэлжилсэн байна.

Одоо Соболенко финалд Жессика Пегула /АНУ/, Елена Рыбакина /Казахстан/ нарын хожсонтой нь тоглох бөгөөд Australian Open тэмцээний эмэгтэйчүүдийн ганцаарчилсан төрлийн шийдвэрлэх тоглолт бямба гарагт болно.

Беларусийн тамирчин тус тэмцээний финалд 4 дэх удаагаа дараалан шалгарч байгаа нь энэ юм. Өмнө нь тэрбээр 2023 ба 2024 онуудад Е.Рыбалкина, Хятадын тамирчин Жэн Цинвэн нарыг хожиж аваргалж байсан бол өнгөрсөн оны тэмцээнийн финалд АНУ-ын теннисчин Мэдисон Киз-д хожигджээ.

Маргааш болох эрэгтэйчүүдийн ганцаарчилсан төрлийн эхний хагас шигшээ тоглолтод Австралийн нээлттэй тэмцээний сүүлийн хоёр түрүүг авсан Италийн теннисчин Янник Синнер, тус тэмцээний 10 удаагийн аварга Сербийн Новак Жоковичтой, дараагийн хагас шигшээ тоглолтод дэлхийн чансааг тэргүүлж буй Испанийн теннисчин Карлос Алькарас Германы тамирчин Александр Зверевтэй өрсөлдөнө. Эрэгтэйчүүдийн финалын тоглолт ням гарагт болно.