Энэ улирлын Аваргуудын лигийн тэмцээний плей-оффын шатанд нэмэлт тоглолт хийж, шөвгийн 16-д шалгарахын төлөө өрсөлдөх багуудын жагсаалт гарчээ.

Тэмцээний үндсэн үе шатны бүх 8 тоглолтод хожсон Английн “Арсенал” баг хамгийн түрүүнд шөвгийн 16-д шууд шалгарсан бол араас нь онооны үзүүлэлтээр Бавариа (Герман), Ливерпүүл (Англи), Тоттенхэм (Англи), Барселона (Испани), Челси (Англи), Спортинг (Португал), Манчестер Сити (Англи) багууд мөн шалгарлаа.

Шилдэг 16-д шалгарахын төлөө 9-24 байрт бичигдсэн Реал (Испани), Интер (Итали), Пари Сен-Жермен (Франц), Ньюкасл (Англи), Ювентус (Итали), Атлетико (Испани), Аталанта (Итали), Байер (Герман), Боруссиа (Дортмунд, Герман), Олимпиакос (Грек), Брюгге (Бельги), Галатасарай (Турк), Монако, Карабах (Азербайжан), Будё-Глимт (Норвег), Бенфика (Португал) багууд тоглохоор болсон байна. Эдгээр багийн хооронд болох нэмэлт тоглолтуудын сугалаа баасан гарагт явагдана.

Харин дараах багууд цаашид өрсөлдөх боломжгүй болжээ. Үүнд: Марсель (Франц), Пафос (Кипр), Юнион (Бельги), ПСВ (Нидерланд), Атлетик (Испани), Наполи (Итали), Копенгаген (Дани), Аякс (Нидерланд), Айнтрахт (Герман), Славия (Чех), "Вильярреал" (Испани), "Кайрат" (Казахстан).

Эх сурвалж: РИА Новости