АНУ-д болох хөл бөмбөгийн ДАШТ-ийг бойкотлохыг ФИФА-гийн ерөнхийлөгч асан Иозеф Блаттер дэмжиж байгаагаа илэрхийлээд, тус улс руу явахгүй байхыг хөгжөөн дэмжигчдэд хандан уриалсан байна.

“Хөгжөөн дэмжигчдэд хандан зөвлөхөд, АНУ-аас аль болох холхон байгаарай” гэж 89 настай тэрбээр Х нийгмийн сүлжээний хуудсандаа бичээд, авилгатай тэмцэх асуудлаар мэргэшсэн Швейцарын шинжээч Марк Пит-ийн байр суурийг дэмжжээ. Шинжээчийн үзэж байгаагаар, АНУ-д нэвтрэх үед хөгжөөн дэмжигчдийг маш хатуу шалгах, Америкийн хил гаалийн албаныхан дур зоргоороо авирлах магадлалтай ажээ.

М.Пит хэдэн хоногийн өмнө Швейцарын Tagesanzeiger сонинд ярилцлага өгөхдөө, АНУ-аас аль болох холхон байхыг хөгжөөн дэмжигчдэд зөвлөсөн байна. “Ямар ч тохиолдолд тоглолтуудыг гэр орондоо телевизээр үзэх нь зүйтэй. Хэрвээ та АНУ-д нэвтрэх үедээ албаныхны таалалд нийцэхгүй бол таныг хамгийн ойрын нислэгээр гэр лүү чинь буцаана, гэхдээ аз тохиовол шүү дээ” хэмээн шинжээч ярьжээ.

Америкийн эрх баригчдын зүгээс цагаачдад хэт хатуу ширүүн хандаж байгаагаас үүдэн удахгүй болох ДАШТ-ийн талаарх маргаан мэтгэлцээн Германд ч мөн өрнөж байна. Тухайлбал, тус тэмцээнийг бойкотлох асуудлыг Германы хөл бөмбөгийн холбооны дэд ерөнхийлөгч Оке Гёттлих хөнджээ. Харин тус холбооны ерөнхийлөгч Бернд Нойендорф бойкотлох асуудлыг одоо ярих нь зохимжгүй гэж үзсэн байна.

Үүний сацуу Германы засгийн газраас АНУ руу зорчих гэж буй иргэддээ хандан анхаарал сэрэмжтэй байхыг зөвлөжээ. Ялангуяа сүүлийн үед анхаарал татаж буй Гренландын асуудал, Канадын бараанд татвар ногдуулах тухай сүрдүүлэг, АНУ-ын Цагаачлалын албанаас зохион байгуулж буй тусгай ажиллагаанууд өргөжиж, хүний амь насанд хүрч байгаа зэргээс шалтгаалан болгоомжлол улам лавширсан байна.

Ташрамд дурдахад, энэ оны зургаадугаар сарын 11-нээс долоодугаар сарын 19-нд болох хөл бөмбөгийн ДАШТ АНУ, Мексик, Канадын 16 хотод явагдахаас 11 нь Америкийн хотууд юм.

Эх сурвалж: DW