Олон улсын олимпын хороо, Азийн олимпын зөвлөлөөс 2026 оноос таван том наадмыг зохион байгуулна.

Үүнтэй холбогдуулан МҮОХ-ны Гүйцэтгэх зөвлөлөөс эдгээр наадамд баг, тамирчдыг ахалж, оролцогч талуудыг удирдлага, зохион байгуулалтаар хангах багийн ахлагч нарыг албан ёсоор томиллоо.

Хамгийн эхнийх нь ердөө 10 хоногийн дараа Италийн Милан-Кортина хотод болох бөгөөд УИХ-ын гишүүн Ч.Номин тус наадамд багийн ахлагчаар ажиллана. Японы Айчи-Нагоя хотод болох Азийн зуны спортын наадамд оролцох Монголын баг тамирчдыг УИХ-ын гишүүн Х.Булгантуяа ахлахаар боллоо. Африк тивд анх удаа болох залуучуудын зуны олимп Сенегалын Дакар аравдугаар сарын 31-нд хөшгөө нээнэ. Тус наадамд оролцох Монголын баг тамирчдыг УИХ-ын гишүүн, ССАЖЗ-ын сайд Ч.Ундрам ахлах юм.

Харин Азийн олимпын зөвлөлийн ивээл дор дөрөвдүгээр сарын 22-нд эхлэх “Санья-2026” элсний наадамд оролцох багийн ахлагчаар МҮОХ-ны гишүүн, Монголын 3х3 сагсан бөмбөгийн холбооны ерөнхийлөгч Л.Мягмаржавыг томилжээ. Азийн элсний наадмыг 14 спортын 61 төрөл зайд зохион байгуулна. Тэгвэл арваннэгдүгээр сард 28-наас Саудын Арабын Эр Рияд хотод болох Азийн танхимын болон тулааны спортын наадамд оролцох Монголын багийг Ерөнхийлөгчийн Тамгын газрын дарга А.Үйлстөгөлдөр ахлахаар болсон байна.